1. Unya sa pag-abot sa ikapitong bulan, ang katawhan sa Israel didto na sa ilang tagsatagsa ka lungsod. Sa unang adlaw nianang bulana nagtigom silang tanan didto sa hawanan sulod sa ganghaan nga ginganlag Ganghaan sa Tubig. Giingnan nila si Esdras, ang pari ug eskriba nga batid sa Balaod, sa pagdala sa basahon sa Balaod nga gihatag sa Ginoo ngadto sa Israel pinaagi kang Moises.
2. Busa gidala ni Esdras ang basahon ngadto sa atubangan sa katawhan nga nagtigom—mga lalaki, mga babaye ug mga kabataan nga may igo nang panabot.
3. Ug gibasa niya kini diha sa ilang atubangan didto sa plasa gikan sa sayo sa buntag hangtod sa udto ug namati sila pag-ayo.
4. Si Esdras nagbarog sa plataporma nga kahoy nga ilang gihimo alang niining katuyoan ug diha sa iyang tuo nagtindog si Mattitias, si Shema, si Anaias, si Urias, si Hilkias ug si Maasias. Dapit sa iyang wala diha si Pedaias, si Misael, si Malquias, si Hashum, si Hasbaddana, si Zacarias ug si Mesullam.
5. Giablihan ni Esdras ang basahon sa Balaod atubangan sa tanang tawo nga diha sa ubos niya ug sa pag-abli niya niini, nanindog ang tanan.
6. Ug gidayeg ni Esdras ang Ginoo, ang gamhanang Dios. Ug ang katawhan mitubag, “Amen! Amen!” uban ang pagpataas sa ilang mga kamot. Unya mihapa sila ug gisimba nila ang Ginoo uban sa dakong pagtahod.
7. Mitabang sa pagpasabot sa katawhan bahin sa Balaod ang mga Levita nga sila si Jesua, si Bani, si Serebias, si Jamin, si Akkub, si Sabbetai, si Hodias, si Maasias, si Kelita, si Azarias, si Jozabad, si Hanan ug si Pelaias. Gihimo nila kini samtang ang mga tawo nagpabilin sa ilang gibarogan.
8. Mihatag silag binaba nga hubad sa Balaod sa Dios ug gihatag nila ang kahulogan niini aron ang mga tawo makasabot.
9. Nanghilak ang katawhan sa pagkabati nila sa Balaod. Busa si Nehemias nga maoy gobernador, si Esdras nga pari ug batid sa Balaod ug ang mga Levita nga nagtudlo sa mga tawo miingon, “Balaan kining adlawa alang sa Ginoo nga atong Dios. Ayaw kamo pagsubo o panghilak.”
10. Unya miingon siya kanila, “Padayon sa inyong nabatasan, kan-a ninyo ang lamiang pagkaon ug imna ninyo ang tam-is nga bino ug padad-i ninyog diyutayng bahin kadtong walay makaon kay balaan kining adlawa alang sa atong Ginoo. Ayaw kamog kaguol kay ang kalipay nga gikan sa Ginoo maoy maglig-on kaninyo.”
11. Busa gipahilom sa mga Levita ang tanang tawo. Sila miingon, “Hilom kamo kay balaan kining adlawa. Ayaw kamo pagsubo.”
12. Ug ang tanang mga tawo nangaon ug nanginom ug gibahinan nila ang walay pagkaon. Nagmaya sila kay nasabtan man nila ang mga pulong nga gisulti kanila.
13. Sa ikaduhang adlaw ang mga pangulo sa mga panimalay sa tanang katawhan, inubanan sa mga pari ug sa mga Levita, nangadto kang Esdras aron pagtuon bahin sa Balaod.
14. Ug nahibaloan nila nga nasulat sa Balaod nga ang Ginoo, pinaagi kang Moises, nagsugo nga ang katawhan sa Israel kinahanglan nga magpuyo sulod sa mga balongbalong sa mga adlaw sa kasaulogan sa ikapitong bulan.
15. Kinahanglan nga imantala nila ug ipahayag sulod sa tanan nilang mga lungsod ug sulod sa Jerusalem kining mosunod: “Lakaw kamo ngadto sa mga kabungtoran ug pagkuha kamog mga sanga sa mga kahoy nga olibo, aguho, mirtol, palmera ug ubang kahoy nga dahonon kaayo aron himoon ninyong balongbalong sumala sa gisugo sa Ginoo.”
16. Busa gituman sa mga tawo ang gisugo kanila ug gihimo nila ang mga balongbalong diha sa ilang mga atop, diha sa hawanan sa ilang mga balay ug diha sa hawanan sa Templo sa Dios ug diha sa plasa atbang sa Ganghaan sa Tubig ug sa Ganghaan ni Efraim.
17. Ug ang katawhan nga miuli gikan sa pagkabihag naghimog mga balongbalong ug gipuy-an nila kini. Nagsadya sila pag-ayo kay sukad sa panahon ni Josue nga anak ni Nun hangtod niadtong adlawa, ang katawhan sa Israel wala man magbuhat niini.
18. Ug adlaw-adlaw gikan sa unang adlaw hangtod sa pagkatapos may gibasa sila gikan sa basahon sa Balaod sa Dios. Gihimo nila ang kasaulogan sulod sa pito ka adlaw ug sa ikawalo nga adlaw naghimo silag balaang tigom sumala sa kasugoan.