1. Ang Ginoo miingon kang Moises,
2. “Sultihi ang mga Israelita niini: Ako mao ang Ginoo nga inyong Dios.
3. Ayaw ninyog buhata ang ilang gibuhat didto sa Ehipto diin kamo nagpuyo kaniadto. Ayaw ninyog buhata ang gibuhat sa taga-Canaan diin dad-on ko kamo. Ayaw kamo pagsunod sa ilang mga batasan.
4. Ang akong mga sugo lamang mao ang inyong buhaton ug tumanon ninyo ang mga tulomanon nga gipatuman ko kaninyo. Ako mao ang Ginoo nga inyong Dios.
5. Busa, matngoni ninyo ang akong mga tulomanon ug ang akong mga sugo kay ang magtuman niini makabaton ug kinabuhi. Ako mao ang Ginoo.
6. “Ayaw kamo pagpakighilawas sa inyong mga paryenti. Ako mao ang Ginoo.
7. Ayaw pakaulawi ang imong amahan pinaagi sa pagpakighilawas sa imong inahan. Imo siyang inahan busa ayaw pagpakighilawas kaniya.
8. Ug ayaw pagpakighilawas sa asawa sa imong amahan kay ang pagbuhat sa ingon maoy pagpakaulaw kaniya.
9. Ayaw usab pagpakighilawas sa imong igsoong babaye nga imong igsoon sa amahan o sa imong inahan ba hinuon, sa walay pagsapayan kon diha ba siya mahimugso sa inyong panimalay o didto ba sa laing dapit.
10. Ug ayaw pagpakighilawas sa imong apo nga babaye kay makauulaw kini alang sa imong kaugalingon.
11. Ayaw usab pagpakighilawas sa anak nga babaye sa imong amahan ug sa imong ina-ina kay siya imo mang igsoon.
12. Ug ayaw pagpakighilawas sa igsoong babaye sa imong amahan kay siya imo mang iyaan.
13. Ayaw usab pagpakighilawas sa igsoong babaye sa imong inahan kay siya imo gihapong iyaan.
14. Ug ayaw pakaulawi ang imong uyoan pinaagi sa pagpakighilawas sa iyang asawa kay siya imo mang iyaan.
15. Ayaw usab pagpakighilawas sa imong umagad nga babaye kay siya asawa man sa imong anak busa ayaw siya pakaulawi.
16. Ug ayaw pagpakighilawas sa asawa sa imong igsoon kay makauulaw kini alang sa imong igsoon.
17. Ayaw pagpakighilawas sa anak o sa apo sa imong asawa kay sila paryenti ra man sa imong asawa ug kini daotan.
18. Ug ayaw pangasaw-a ang igsoon sa imong asawa ug makighilawas kaniya samtang buhi pa ang imong asawa.
19. “Ayaw usab pagpakighilawas sa usa ka babaye nga giregla kay hugaw siya.
20. Ug ayaw pagpakighilawas sa asawa sa imong isigkatawo aron dili ka mahugaw.
21. Ayaw usab pagtugot nga usa sa imong kabataan ang sunogon aron ihalad kang Moloc kay sa ingon wala mo tahora ang ngalan sa imong Dios. Ako mao si Yahweh.
22. Ayaw usab pagpakighilawas sa imong isigkalalaki kay daotan kini kaayo.
23. Ug ayaw pagpakighilawas sa usa ka mananap aron dili ka mahugaw tungod niini. Ginadili usab sa babaye ang pagtugyan sa iyang kaugalingon ngadto sa usa ka mananap aron makighilawas niini kay kining buhata hilabihan ka daotan.
24. “Ayaw ninyo hugawi ang inyong kaugalingon sa bisan hain niining mga butanga kay mao kini ang nakapahugaw sa mga katawhan nga gisalikway ko sa inyong atubangan.
25. Ang ilang nasod nahugaw busa gisilotan ug gisalikway ko sila.
26. Apan kamo, lumad man o langyaw nga nagpuyo tipon kaninyo, tumana ninyo ang akong mga sugo ingon man ang mga tulomanon. Ug ayaw ninyo buhata ang bisan hain niining mga butanga nga daotan kaayo
27. kay mao kini ang gibuhat sa unang mga lumolupyo niining yutaa nga maoy nakapahugaw niini.
28. Tumana ninyo ang akong mga sugo aron dili ko kamo hinginlan gikan niining yutaa tungod sa inyong pagbuling niini sama nga gihinginlan ko ang katawhan nga unang nagpuyo dinhi.
29. Ang magbuhat sa bisan hain niining mga butanga nga salawayon kaayo, hinginlan gikan sa katawhan sa Dios.
30. “Busa tumana ninyo ang akong sugo nga dili kamo magbuhat sa bisan hain niining mga salawayong buhat nga gibuhat sa katawhan niining dapita sa wala pa kamo mahianhi aron dili kamo mahugaw tungod niini: Ako mao ang Ginoo nga inyong Dios.”