1. Ang Ginoo miingon usab kang Moises,
2. “Kini mao ang tulomanon bahin sa paghinlo sa usa ka sanlahon. Dad-on siya ngadto sa pari,
3. ug ang pari mogawas sa kampo aron sa paghiling kaniya. Kon makita sa pari nga naayo na ang iyang sanla,
4. magpakuha ang pari ug duha ka buhing langgam nga hinlo ug kahoy nga sidro ug pula nga higot ug isopo alang kaniya nga pagahinloan.
5. Unya ipapatay sa pari ang usa ka langgam diha sa sudlanan nga kulon ug may sulod nga tubig gikan sa tubod.
6. Unya kuhaon niya ang buhi nga langgam ug ang kahoy nga sidro ingon man ang pula nga higot ug ang isopo ug ituslob niya kini sa dugo sa langgam nga gipatay sa ibabaw sa tubig.
7. Ang dugo iyang iwisik sa makapito sa tawo nga pagahinloan sa sanla. Human niini, ipahibalo niya nga ang tawo hinlo na ug iyang buhian ang langgam nga buhi.