1. Ang Ginoo miingon kang Josue, “Ayaw kahadlok ug kaluya. Dad-a ang tanang sundalo ngadto sa Ai. Itugyan ko kanimo ang hari sa Ai ug maimo ang iyang katawhan, siyudad ug yuta.
2. Buhata sa Ai ug sa iyang hari ang gibuhat mo sa Jerico ug sa iyang hari apan niining higayona inyoha na ang iyang mga kabtangan ug mga kahayopan. Sulonga ninyog kalit ang siyudad agi sa likod.”
3. Busa nangandam si Josue aron pagsulong sa Ai. Nagpili siyag 30,000 ka isog nga mga tawo ug gipaadto sila pagkagabii
4. ug gipahimangnoan, “Tago kamo sa likod nga bahin sa siyudad. Ayaw pagpalayo kaayo gikan niini kondili pangandam kamo sa pagsulong.
5. Ako ug ang mga sundalo nga uban kanako mouna pagsulong sa siyudad. Iniggula nila aron pagsukol kanamo manibog kami sama sa una tang gibuhat.
6. Gukdon kami nila hangtod mapagawas namo sila sa siyudad. Magdahom sila nga nanagan kami sama sa gibuhat nato kaniadto.
7. Unya panggula kamo sa inyong gitagoan ug iloga ang siyudad nga itugyan kaninyo sa Ginoo nga inyong Dios.
8. Human ninyo mailog ang siyudad sunoga kini sumala sa sugo sa Ginoo. Mao kanay buhata!”
9. Busa gipaadto sila ni Josue ug nangadto sila sa dapit nga ilang tagoanan nga didto sa kasadpan sa Ai, tungatunga sa Ai ug sa Betel. Mipahulay si Josue sa kampo pagkagabii.
10. Sayo sa buntag mibangon si Josue ug gitigom niya ang mga sundalo. Unya siya ug ang mga pangulo sa Israel nangulo kanila ngadto sa Ai.
11. Ang mga sundalo nga uban kaniya didto paingon sa dakong ganghaan sa siyudad ug nagkampo sa amihanang bahin diin may walog tungatunga kanila ug sa Ai.
12. Unya gidala niya ang mga 5,000 ka tawo ug gipalipot sila sa kasadpang bahin sa siyudad, tungatunga sa Ai ug sa Betel.
13. Ingon niini ang pagkahan-ay sa mga sundalo: ang labing daghan sa mga sundalo didto sa amihanan sa siyudad ug ang uban didto sa kasadpan. Pagkagabii si Josue didto mipahulay sa walog.
14. Sa dihang nakita sa hari sa Ai ang mga sundalo sa Israel milihok dayon siya. Siya ug ang tanan niyang sundalo mipaingon sa Walog sa Jordan aron pagpakig-away sa Israel. Apan wala siya masayod nga sulongon siya gikan sa likod sa siyudad.
15. Si Josue ug ang mga sundalo sa Israel nagpatuo nga nanibog sila ug nanagan paingon sa kamingawan.
16. Busa ang tanang lalaki sa siyudad gitigom aron sa paggukod kanila. Ug sa dihang gigukod nila si Josue, nag-anam silag kalayo sa siyudad.
17. Ang tanang lalaki sa Ai migula aron paggukod sa mga Israelita. Naabli pag-ayo ang siyudad ug walay nahibilin sa pagpanalipod niini.
18. Unya ang Ginoo miingon kang Josue, “Iisa ang imong bangkaw ug itumong sa Ai kay gihatag ko kini kanimo.” Gibuhat kini ni Josue
19. ug dihadiha sa pag-isa niya sa iyang kamot, ang mga tawo nga nanago nanindog pagkalit ug nanagan ngadto sa siyudad ug giilog nila kini. Ila dayong gisunog ang siyudad.
20. Sa paglingi sa mga tawo sa Ai, nakita nila ang aso nga miutbo. Wala na silay dapit nga kadaganan tungod kay ang mga Israelita nga nanagan sa kamingawan misumbalik man sa pagsulong kanila.
21. Sa pagkakita ni Josue ug sa kasundalohan sa Israel nga nakuha na sa ilang mga kauban ang siyudad ug nga kini gisunog na, misumbalik sila ug misugod sa pagpamatay sa mga tawo sa Ai.
22-23. Ang mga sundalong Israelita nga didto sa siyudad nakig-away usab sa mga tawo sa Ai. Nalibotan nila ang mga tawo sa Ai ug ilang gipamatay ug walay nakalingkawas o nabuhi gawas sa hari sa Ai. Gidakop nila siya ug gidala ngadto kang Josue.
24. Gipatay sa mga Israelita ang tanang kaaway nga naglutos kanila didto sa kamingawan. Unya namalik sila sa Ai ug gipatay nila ang mga nahibilin didto.
25. Niadtong adlawa 12,000 ka lalaki ug babaye nga lumolupyo sa Ai ang gipamatay nila.
26. Giisa ni Josue ang bangkaw ug gitumong sa Ai ug wala kini ipaubos hangtod nangamatay ang tanang tawo.
27. Gihipos sa mga Israelita ang mga kahayopan ug mga kabtangan nga nailog nila diha sa siyudad sumala sa sugo sa Ginoo kang Josue.
28. Gisunog ni Josue ang Ai ug wala na kini tukora pag-usab.
29. Gibitay niya ang hari sa Ai didto sa kahoy ug gipasagdan didto hangtod sa pagkahapon. Pagsalop sa adlaw gipakuha ni Josue ang patayng lawas ug giitsa kini didto sa ganghaan sa siyudad. Gitabonan nila kini sa dakong tapok sa mga bato ug nagpabilin ang maong mga bato hangtod karon.
30. Unya nagtukod si Josue didto sa Bukid sa Ebal ug usa ka halaran alang sa Ginoo, ang Dios sa Israel.
31. Gibuhat kini niya sumala sa pahimangno nga gihatag ni Moises, ang alagad sa Ginoo, ngadto sa mga Israelita sumala sa nahisulat sa Balaod ni Moises: “Usa ka halaran nga bato nga wala kagamitig puthaw nga kahimanan.” Nagsunog silag mga halad ibabaw niini alang sa Ginoo ug gihalad usab nila ang ilang halad sa pakigdait.
32. Didto atubangan sa mga Israelita, gikopya ni Josue diha sa mga bato ang Balaod nga gisulat ni Moises.
33. Ang tanang Israelita uban sa ilang mga pangulo, mga punoan ug mga maghuhukom ingon man ang mga langyaw nga diha kanila, nagtindog sa matag kilid duol sa Sudlanan sa Kasabotan sa Ginoo atubangan sa mga paring Levita nga nagyayong sa Sudlanan. Katunga sa katawhan nagtindog sa bakilid sa Bukid sa Gerisim ug ang katunga didto sa Bukid sa Ebal. Ang alagad sa Ginoo nga si Moises dugay nang nagsugo kanila sa pagbuhat niini sa panahon nga dawaton nila ang panalangin.
34. Unya gikusog pagbasa ni Josue ang tibuok Balaod lakip ang mga panalangin ug mga tunglo sumala sa nahisulat sa basahon sa Balaod.
35. Ang tagsatagsa ka sugo ni Moises gibasa ni Josue ngadto sa tanang nanambong nga naglakip sa mga babaye, kabataan ug mga langyaw nga nagpuyo tipon kanila.