1. Wala motuman ang Israel sa sugo sa Ginoo sa dili pagkuhag bisan unsa nga laglagonon. Si Acan maoy mikuhag mga butang. Anak siya ni Carmi nga anak ni Zabdi nga anak ni Zera sa banay ni Juda. Tungod niini ang Ginoo nasuko pag-ayo sa mga Israelita.
2. Nagpadala si Josue ug mga tawo gikan sa Jerico ngadto sa Ai, usa ka siyudad sa silangan sa Betel nga duol sa Bet-aben. Iya silang gipaadto aron pagsusi sa yuta. Busa nangadto sila ug naniid sa Ai.
3. Sa pagbalik nila, giingnan nila si Josue, “Wala nay kinahanglan nga moadto ang tanan. Pasulonga lamang sa Ai ang duha o tulo ka libo ka sundalo. Ayaw ipadala ang tanan sa pag-away didto kay dili kana dako nga siyudad.”
4. Busa misulong ang mga 3,000 ka Israelita apan gipasibog sila sa mga taga-Ai.
5. Ang mga taga-Ai nakapatay ug mga 36 kanila ug gigukod nila ang mga Israelita gikan sa ganghaan sa siyudad hangtod sa mga kabatoan ug gipamatay nila samtang nanglugsong sa kabungtoran. Unya mitalaw ang mga Israelita ug nangahadlok.
6. Tungod sa kasubo gigisi ni Josue ang iyang bisti ug mihapa sa yuta atubangan sa Sudlanan sa Kasabotan sa Ginoo. Ang mga pangulo sa Israel mihapa usab didto uban kaniya hangtod sa gabii ug gibutangan nilag abog ang ilang ulo aron pagpaila sa ilang kasubo.
7. Ug miingon si Josue, “O Ginoo nga among Dios! Nganong gidala pa man kami nimo tabok sa Jordan? Aron ba lamang ipapatay kami sa mga Amorihanon? Nganong wala na man lang kami nimo papuy-a didto sa pikas tampi sa Jordan?
8. Unsay ikasulti ko, O Ginoo, karon nga gipasibog sa kaaway ang Israel?
9. Siguro gayod nga makabalita ang mga Canaanhon ug ang tanang lumolupyo niining yutaa. Unya libotan kami nila ug pamatyon! Ug unsa may buhaton mo sa pagpanalipod sa imong kadungganan?”
10. Ang Ginoo miingon kang Josue, “Tindog! Nganong mihapa ka man?
11. Nakasala ang Israel! Wala nila tumana ang kasabotan. Gikuha nila ang pipila ka butang nga gigahin aron laglagon. Gikawat nila kini ug namakak sila bahin niini ug gitipon nila kini sa ilang kaugalingong mga butang.
12. Busa ang mga Israelita wala makabuntog sa ilang mga kaaway. Nanibog sila tungod kay gihukman na sila karon nga laglagon! Dili na ako magauban kaninyo gawas kon laglagon ninyo ang mga butang nga wala ko ipakuha kaninyo!
13. Hala, tindog! Buhata ang gikinahanglan nga mga seremonyas ug andama ang mga tawo sa pag-atubang kanako. Sultihi sila sa pagpangandam sa pag-atubang kanako ugma, kay ako, ang Ginoo nga Dios sa Israel, moingon, ‘Israel, naghupot ka ug pipila ka butang nga gipalaglag ko kanimo! Dili ka makaharong sa imong mga kaaway hangtod nga isalikway mo kining mga butanga!’
14. Busa sa buntag paatubangon ang tagsatagsa ka banay. Sa banay nga napilian sa Ginoo moatubang ang matag panimalay. Ug sa panimalay nga mapilian moatubang ang matag sakop niini.
15. Ang masakpan nga naghupot sa mga butang nga gigahin nga laglagonon pagasunogon uban sa tanan nga iyaha tungod kay iyang gilapas ang kasabotan nga gihimo sa akong katawhan uban kanako. Naghatag siyag dako kaayong kaulawan sa Israel.”
16. Sayo sa buntag mibangon si Josue ug gipatawag niya ang tagsatagsa ka banay sa Israel ug napili niya ang banay ni Juda.
17. Unya gipaatubang niya ang mga banay nga sakop sa banay ni Juda ug napili ang banay ni Zera. Ug gipaatubang niya ang banay ni Zera ug napili ang panimalay ni Zabdi.
18. Unya gidala ni Zabdi sa atubangan ang matag tawo sa iyang panimalay ug si Acan maoy napili. Anak siya ni Carmi nga anak ni Zabdi nga anak ni Zera sa banay ni Juda.
19. Ug si Josue miingon kang Acan, “Anak ko, isugid ang kamatuoran dinhi sa atubangan sa Ginoo, ang Dios sa Israel ug tug-ani ako sa gibuhat mo. Ayaw kinig itago kanako.”
20. Ug mitubag si Acan, “Oo, nakasala ako sa Ginoo, ang Dios sa Israel ug mao kini ang akong gibuhat.
21. Nakakita akog matahom nga kupo nga hinimo sa Shinar ug plata nga mga duha ka kilo ug usa ka baritang bulawan nga kapin sa tunga sa kilo. Naibog ako kaayo niini busa gikuha ko kini. Gilubong ko kini sulod sa akong tolda ug ang plata anaa sa ilalom.”
22. Busa gipaadto ni Josue ang pipila ka tawo ngadto sa tolda ug nakit-an gayod ang gilubong didto uban sa plata nga didto sa ilalom.
23. Gikuha kini nila ug gidala ngadto kang Josue ug sa tanang mga Israelita ug gipahiluna atubangan sa Ginoo.
24. Unya gidala ni Josue ug sa tanang katawhan sa Israel si Acan ug ang plata, ang kupo, ang baritang bulawan, ang iyang mga anak, ang iyang mga baka, asno, karnero ug ang iyang tolda ug ang tanan nga iyaha ngadto sa walog nga ginganlag Walog sa Kasamok.
25. Ug miingon si Josue, “Nganong gisamok mo man kami? Ang Ginoo magdala karon kanimog kasamok!” Unya gibato si Acan sa tanang mga tawo. Gibato nila ug gisunog ang iyang panimalay ug mga kabtangan.
26. Gitabonan nila siya sa dakong tapok sa mga bato nga anaa pa hangtod karon. Busa hangtod karon ang maong dapit gitawag nga Walog sa Kasamok.Unya wala na masuko kanila ang Ginoo.