1. Unya ang Ginoo miingon kang Josue,
2. “Sultihi ang katawhan sa Israel sa pagpili sa mga siyudad nga dalangpanan nga gisulti ni Moises kaninyo sumala sa akong sugo.
3. Ang tawo nga makapatay ug laing tawo nga dili tinuyo makadangop didto aron paglikay sa tawo nga manimalos kaniya.
4. Makatago siya sa bisan hain niining mga siyudara ug makaadto sa hukmanan sa ganghaan sa siyudad ug makasugid siya sa nahitabo ngadto sa mga pangulo. Unya pasudlon nila siya sa siyudad ug hatagag dapit nga kapuy-an aron makapabilin siya didto.
5. Kon ang tawo nga buot manimalos mosunod kaniya sa siyudad, ang katawhan sa siyudad dili magtugyan sa tawo nga nakapatay ngadto sa nangita kaniya. Panalipdan nila siya kay ang iyang pagpatay ug isigka-Israelita dili man tinuyo ug dili tungod sa kasuko.
6. Magpabilin siya sa siyudad hangtod nga husayon siya atubangan sa katilingban ug hangtod nga mamatay ang Pangulong Pari. Unya makapauli na siya sa ila.”
7. Busa gilain nila ang Kedes sa Galilea sa kabungtoran ni Neftali ug ang Siquem sa kabungtoran ni Efraim ingon man ang Kiriat-arba (o Hebron) sa kabungtoran ni Juda.
8. Sa silangan sa Jordan, sa kabungtoran silangan sa Jerico sa kamingawan, gipili nila ang Bezer sa banay ni Ruben, ang Ramot sa Gilead sa banay ni Gad ug ang Golan sa Basan sa banay ni Manases.
9. Mao kini ang mga siyudad nga dalangpanan nga gipili alang sa tanang katawhan sa Israel ug alang ni bisan kinsang langyaw nga nagpuyo uban kanila. Bisan kinsa nga makapatay nga wala tuyoa makadangop didto. Dili siya mapatay niadtong buot manimalos kaniya ug husayon siya didto sa atubangan sa katilingban.