23. Mao kini ang modangat kanila kay nagpakabuang man sila—nanapaw sila ug nagsultig mga bakak ginamit ang ngalan sa Ginoo. Supak kini sa kabubut-on sa Ginoo. Nasayod siya sa ilang gibuhat ug siya maoy saksi batok kanila. Ang Ginoo maoy nagsulti niini.”
24-25. Ang Ginoo nga Labing Gamhanan, ang Dios sa Israel, nagsugo kanako sa pagsulti kang Semaias nga taga-Nehelam, “Nagpadala kag mga sulat sa imong ngalan ngadto sa tanang lumolupyo sa Jerusalem ug kang Sofonias nga anak sa pari nga si Maasias ug sa tanang kaparian. Sa maong mga sulat nag-ingon ka kang Sofonias:
26. ‘Gipili ka sa Ginoo ingon nga pari puli kang Jehoiada ug ikaw na karon ang labawng pangulo sa Templo. Katungdanan mo ang pagdakop sa tanang buang nga nagpakapropeta ug pagkadena ug pagbutang ug puthaw diha sa ilang liog.
27. Nganong wala mo man badlonga si Jeremias nga taga-Anatot nga misulti ingon nga propeta ngadto sa katawhan?
28. Kinahanglan badlongon si Jeremias kay nagpadala man siyag mensahe ngadto sa katawhan nga atua sa Babilonia nga bilanggoon sila didto ug dugay busa kinahanglan nga magtukod silag mga balay nga ilang puy-an ug mananom aron may makaon sila.’”
29. Ang pari nga si Sofonias maoy nagbasa niining sulata ngadto kang Jeremias.
30. Unya gisugo sa Ginoo si Jeremias
31-32. sa pagpadalag mensahe ngadto sa tanang binihag didto sa Babilonia ug sa pagsugilon kanila sa giingon sa Ginoo bahin kang Semaias: “Ako, ang Ginoo, mosilot kang Semaias ug sa tanan niyang kaliwat. Wala ko siya sugoa apan nagsulti siya kaninyo nga daw propeta ug gipatuo kamo niyag mga bakak. Dili siya makabaton ug kaliwat tipon kaninyo. Dili siya makakita sa mga maayong butang nga akong buhaton alang sa akong katawhan kay gidasig man niya sila sa pagsukol kanako. Ako, ang Ginoo, maoy nagsulti niini.”