1. Ikaduhang tuig kadto sa paghari ni Dario sa Persia. Sa unang adlaw sa ikaunom nga bulan, nakigsulti ang Ginoo pinaagi kang propeta Hageo ngadto sa gobernador sa Juda nga si Zerubabel, ang anak ni Salatiel, ug ngadto sa Pangulong Pari nga si Josue nga anak ni Josedec.
2. Nag-ingon ang Ginoo nga Labing Gamhanan ngadto kang Hageo, “Nag-ingon kining mga tawhana nga wala pa moabot ang panahon sa pagtukod pag-usab sa Templo sa Ginoo.”
3. Unya ang Ginoo misulti sa mensahe alang sa katawhan pinaagi kang propeta Hageo,
4. “Maayo ba nga kamo magpuyo sa anindot nga mga balay samtang ang akong Templo guba gihapon?
5. Hunahunaa ang inyong kahimtang.
6. Daghan kamog gipugas apan diyutay ray inyong naani. Nakakaon kamo apan wala gayod kamo mabusog. Miinom kamog bino apan wala gayod kamo matagbaw. May bisti kamo apan gitugnaw gihapon. Ug kadtong nagdawat ug suhol sama rag nagsulod niini sa alkansiya nga buslot.
7. Wala ba kamo makakita nganong nahitabo kini?
8. Tungas kamo sa kabungtoran ug pagkuha kamog kahoy nga itukod pag-usab sa akong Templo aron ako malipay ug ipakita ko kaninyo ang akong himaya.
9. “Nangandoy kamog dagkong ani apan diyutay ra ang inyong nakaplagan ug sa nadala ninyo kini sa inyong balay giwagtang ko kini. Ngano man? Tungod kay nagpabiling guba ang akong Templo samtang kamo nagkapuliki sa paghimo sa inyong balay.
10. Tungod niini ang langit wala na mohatag kaninyog ulan ug ang yuta wala na mohatag sa iyang abot.
11. Ug gipadad-an kog hulaw ang kayutaan: ang mga kabungtoran, ang kaumahan, ang kaparasan, ang kaolibohan ug ang tanan nga moturok sa yuta, ang mga tawo, mga kahayopan ug ang tanan nilang gitanom.”
12. Unya si Zerubabel nga anak ni Salatiel ug ang Pangulong Pari nga si Josue nga anak ni Josedec, lakip ang tanang nahibilin sa katawhan nga nahiuli gikan sa pagkabihag sa Babilonia, mituman sa sugo sa Ginoo nga ilang Dios. Nahadlok sila sa Ginoo busa gituman nila ang mga pulong ni Hageo, ang propeta nga pinadala sa Dios.
13. Unya si Hageo misulti sa mensahe sa Ginoo ngadto sa katawhan, “Mag-uban ako kaninyo.”
14. Ug gidasig sa Ginoo si Zerubabel nga gobernador sa Juda ingon man si Josue ug ang tanang nahiuli gikan sa pagkabihag ug gisugdan nila ang pagtrabaho sa Templo sa Ginoo nga Labing Gamhanan nga ilang Dios,
15. sa ika-24 nga adlaw, sa ikaunom nga bulan sa ikaduha nga tuig sa paghari ni Dario.