1. Wala na gayod kapugngi ni Jose ang iyang kaugalingon sa atubangan sa tanan nga nag-alagad kaniya busa miingon siya, “Pahawa kamong tanan.” Wala nay laing tawo nga uban kaniya sa dihang gitug-anan niya ang iyang mga igsoon kon kinsa siya.
2. Mihilak siyag kusog ug ang mga Ehiptohanon nakadungog niini ug gibalitaan ang hari bahin niini.
3. Miingon si Jose sa iyang mga igsoon, “Ako si Jose! Buhi pa ba ang akong amahan?” Apan nalisang pag-ayo ang iyang mga igsoon ug wala sila makatubag.
4. Unya miingon si Jose kanila, “Duol kamo kanako.” Ug miduol sila ug giingnan sila ni Jose, “Ako ang inyong igsoon nga gibaligya ninyo nganhi sa Ehipto.
5. Apan ayaw ikaguol o pakasad-a ang inyong kaugalingon tungod sa inyong pagbaligya kanako. Kay ang Dios maoy nagpaanhi kanako una kaninyo aron maluwas ang kinabuhi sa katawhan.
6. Ikaduhang tuig pa lamang kini sa gutom. May lima pa ka tuig nga dili mahimo ang pagdaro ug pag-ani.
7. Gipauna ako sa Dios nganhi aron pagsiguro nga may mga kaliwat kamo nga mahibilin ug aron maluwas kamo.
8. Busa dili kamo ang nagpadala kanako nganhi kondili ang Dios. Gihimo niya ako nga daw amahan ni Paraon ug gitugyan kanako ang katungod sa pagdumala sa tibuok nasod ug sa pagmando sa tibuok Ehipto.
9. “Karon pagdali kamog pauli ngadto sa akong amahan ug suginli siya nga mao kini ang giingon sa iyang anak nga si Jose: ‘Gihimo ako sa Dios nga gobernador sa tibuok Ehipto busa ari diri sa walay langan.
10. Makapuyo ka diri sa yuta sa Gosen aron mahiduol na ikaw kanako ingon man ang imong mga anak ug mga apo lakip ang imong mga karnero, mga kanding, mga baka ug ang tanan nga imoha.
11. Kon ari ka puyo sa Gosen, maatiman ko ikaw. May lima pa ka tuig nga gutom ug dili ako buot nga magkalisodlisod ka ug ang imong pamilya ug ang tanan nga imoha.’
12. Nakakita kamong tanan ug ikaw usab, Benjamin, nga ako gayod ang nakigsulti kaninyo.
13. Suginli ang akong amahan unsa ako kagamhanan dinhi sa Ehipto ug suginli siya sa tanan nga inyong nakita dinhi. Busa pagdali kamo ug dad-a siya nganhi.”
14. Unya gigakos niya ang iyang igsoon nga si Benjamin ug mihilak siya. Mihilak usab si Benjamin samtang naggakos kaniya.
15. Unya gitagsatagsa niya paghalok ang tanan niyang mga igsoon ug naghilak siya samtang naggakos kanila. Human niadto, ang iyang mga igsoon misugod sa pagpakigsulti kaniya.
16. Sa dihang nahibaloan didto sa palasyo ni Paraon nga nahiabot ang mga igsoon ni Jose, gikalipay kini ni Paraon ug sa iyang mga opisyal.
17. Giingnan ni Paraon si Jose, “Pakargahi sa imong mga igsoon ang ilang mga asno aron makapauli sila sa Canaan.
18. Ipakuha nila ang ilang amahan ug ang ilang mga pamilya ug paanhia sila kanako kay ihatag ko kanila ang labing maayong yuta sa Ehipto ug makakaon sila sa labing maayong abot sa yuta.
19. Padad-a usab silag mga sakyanan sa Ehipto aron maoy kargahan sa ilang mga asawa ug mga bata ug ipakuha ang ilang amahan.
20. Dili sila angay nga mawili pagbiya sa ilang kabtangan kay ihatag ko kanila ang labing maayo nga yuta sa Ehipto.”
21. Gituman kini sa mga anak ni Jacob. Gihatagan sila ni Jose ug mga sakyanan sumala sa sugo ni Paraon ug mga pagkaon alang sa ilang panaw.
22. Gihatagan usab niya silag tagsa ka buok bisti nga ikapuli nilag sul-ob apan si Benjamin gihatagan niyag 300 ka salapi ug lima ka sinina.
23. Gipadad-an niya ang iyang amahan ug napulo ka asno nga gikargahan sa labing maayong mga abot sa Ehipto ug laing napulo ka asno nga gikargahan ug bugas, pan ug uban pang mga pagkaon alang sa iyang amahan inigpaingon niya sa Ehipto.
24. Unya gipagikan ni Jose ang iyang mga igsoon ug sa paglakaw na nila, giingnan niya sila, “Ayaw kamo pag-away samtang magpanaw kamo.”
25. Mibiya sila sa Ehipto ug miabot sa Canaan ngadto sa ilang amahan nga si Jacob.
26. Ug gisuginlan nila siya nga buhi pa si Jose ug nahimo pa gayong gobernador sa Ehipto. Nakugang pag-ayo si Jacob ug wala siya makatuo sa ilang gisulti.
27. Apan sa dihang ilang gisugilon kaniya ang tanan nga gisulti ni Jose ug sa pagkakita niya sa mga sakyanan nga gipadala ni Jose aron sakyan niya paingon sa Ehipto, nahibalik ang iyang kadasig ug nalipay siya pag-ayo.
28. Unya miingon siya, “Igo na! Buhi gayod diay ang akong anak nga si Jose! Kinahanglan nga moadto ako aron makita ko siya sa dili pa ako mamatay.”