1. Si Adan nakighilawas kang Eva nga iyang asawa ug nanamkon si Eva ug nanganak ug batang lalaki. Miingon si Eva, “Nakabaton akog anak tungod sa panabang sa Ginoo.” Busa ginganlan niyag Cain ang bata.
2. Unya nanganak siyag laing batang lalaki nga ginganlan ug Abel. Si Abel magbalantay sa mga karnero ug si Cain mag-uuma.
3. Usa ka adlaw niana, naghalad si Cain ngadto sa Ginoo ug mga abot sa iyang uma.
4. Nagkuha usab si Abel ug pipila sa mga panganay sa iyang kahayopan ug giihaw niya kini ug gihalad ang labing maayong mga bahin ngadto sa Ginoo. Nahimuot ang Ginoo kang Abel ug sa iyang halad
5. apan wala niya dawata si Cain ug ang iyang halad. Busa nasuko si Cain ug nagmug-ot.
6. Ang Ginoo miingon kang Cain, “Nganong nasuko ug nagmug-ot ka man?
7. Kon maayo pa ang imong gibuhat, dawaton ko unta ang imong halad. Apan kay daotan man, ang sala nag-atang kanimo sama sa ihalas nga mananap nga buot motukob kanimo busa kinahanglan buntogon mo kini.”
8. Unya si Cain miingon kang Abel, “Mangadto ta sa uma.” Sa didto na sila sa kaumahan, giunay ni Cain pagpatay ang iyang igsoon.
9. Unya ang Ginoo nangutana kang Cain, “Hain man si Abel nga imong igsoon?”Si Cain mitubag, “Ambot! Magbalantay ba gud ko sa akong igsoon?”
10. Busa miingon ang Ginoo, “Nganong gihimo mo man kini? Nadungog ko ang dugo sa imong igsoon nga nagsangpit kanako gikan sa yuta.
11. Karon tinunglo ka na ug isalikway ka sa yuta diin ang dugo sa imong igsoon nga imong gipatay miagas ug mituhop.
12. Kon mag-uma ka, ang yuta dili na mohatag kanimog abot. Magtagotago ka ug maglatagaw nga walay pinuy-anan sa kalibotan.”
13. Si Cain miingon sa Ginoo, “Bug-at ra kaayo kanako kining silota.
14. Giabog mo ako gikan niining yutaa ug gikan sa imong atubangan. Maglatagaw ug magtagotago ako sa kalibotan ug patyon ako ni bisan kinsa nga makakita kanako.”
15. Apan ang Ginoo mitubag kaniya, “Dili kana mahitabo! Ang mopatay kanimo panimaslan ug silotan ko ug pito ka pilo.” Busa gibutangan sa Ginoo ug patik si Cain aron dili siya patyon sa makakita kaniya.
16. Ug si Cain mipahilayo sa Ginoo ug mipuyo sa yuta nga ginganlag Nod sa silangan sa Eden.
17. Si Cain nakighilawas sa iyang asawa. Nanamkon ang iyang asawa ug nanganak ug batang lalaki nga ginganlan nilag Enoc. Unya nagtukod si Cain ug siyudad nga ginganlan niyag Enoc agig pasidungog sa iyang anak.
18. Si Enoc may anak nga ginganlag Irad nga mao ang amahan ni Mehujael ug si Mehujael maoy amahan ni Metusael. Si Metusael maoy amahan ni Lamec.
19. Duha ang asawa ni Lamec: si Ada ug si Zilla.
20. Si Ada nanganak kang Jabal nga mao ang amahan sa mga nagbuhig kahayopan ug nagpuyo sa mga tolda.
21. Ang ngalan sa iyang igsoon mao si Jubal nga mao ang amahan sa tanang musikero nga nagatugtog sa alpa ug sa plawta.
22. Unya nanganak si Zilla kang Tubal-Cain nga mao ang ginikanan sa tanang tiggama ug mga butang gikan sa bronsi ug puthaw. Ang igsoong babaye ni Tubal-Cain mao si Naama.
23. Si Lamec miingon sa iyang duha ka asawa,“Ada ug Zilla, paminawa ninyo ako.Nakapatay akog batan-ong lalaki tungod kay gisumbag niya ako.
24. Kon ang panimalos alang kang Cain pito ka pilo,ang panimalos alang kanako kapitoan ug pito ka pilo.”
25. Unya nakighilawas na usab si Adan sa iyang asawa ug si Eva nanganak ug batang lalaki. Si Eva miingon, “Gihatagan ako sa Dios ug anak ilis kang Abel nga gipatay ni Cain.” Busa ginganlan niya ang bata ug Set.
26. Si Set may anak nga lalaki nga ginganlan niyag Enos. Nagsugod niadtong panahona ang mga tawo pagsangpit ug pagsimba sa ngalan ni Yahweh.