1. Gipanalanginan sa Ginoo si Sara sumala sa iyang gisaad
2. ug nagsabak siya ug nanganak ug batang lalaki sa dihang tigulang na si Abraham. Natawo ang bata sa adlaw nga gisaad sa Dios.
3. Ginganlan ni Abraham ang iyang anak ug Isaac.
4. Sa walo na ka adlaw ang bata, gituli siya ni Abraham sumala sa gisugo kaniya sa Dios.
5. Usa ka gatos ka tuig ang edad ni Abraham sa pagkatawo ni Isaac.
6. Miingon si Sara, “Gilipay ug gipakatawa ako sa Dios. Mangatawa ang tanan uban kanako inigkasayod nila niini.”
7. Unya midugang siya sa pag-ingon, “Kay kinsay makasulti kang Abraham nga ako makapasuso pa? Apan ako nanganak ug batang lalaki bisag tigulang na si Abraham.”
8. Nagtubo ang bata ug sa adlaw sa paglutas niya, nagkombirag dako si Abraham.
9. Usa ka adlaw niana, si Ismael nga anak ni Abraham ug ni Hagar nga Ehiptohanon nagdula uban kang Isaac nga anak ni Sara.
10. Sa pagkakita ni Sara niini, giingnan niya si Abraham, “Papahawaa kining ulipon nga babaye ug ang iyang anak. Kinahanglan dili mo bahinan sa imong katigayonan ang iyang anak kay ang akong anak nga si Isaac mao ray angay manunod niini.”
11. Nakapaguol kini pag-ayo kang Abraham kay si Ismael iya man usab nga anak.
12. Apan ang Dios miingon kang Abraham, “Ayaw kaguol sa bata ug sa imong ulipon nga si Hagar. Buhata ang giingon kanimo ni Sara kay pinaagi kang Isaac maimo ang mga kaliwat nga akong gisaad.
13. Hatagan ko usab ug daghang anak ang anak sa ulipon aron mahimo silang nasod kay siya usab imo mang anak.”
14. Sayo sa pagkabuntag gihatagan ni Abraham si Hagar ug kalan-on ug tubig nga gisulod sa panit nga sudlanan. Gipasung-ay niya ang bata kang Hagar ug iyang gipalakaw. Unya milakaw si Hagar ug naglatagaw sa kamingawan sa Berseba.
15. Sa nahutdan na siyag tubig, gibiyaan niya ang bata ubos sa usa ka sampinit.
16. Ug milingkod siya sa dapit nga may mga 100 ka metros ang gilay-on gikan sa bata. Miingon siya sa iyang kaugalingon, “Dili ako makaako pagsud-ong nga mamatay ang bata.” Unya samtang naglingkod siya didto, mihilak ang bata.
17. Nadungog sa Dios ang hilak sa bata, ug gikan sa langit ang anghel sa Dios misulti kang Hagar, “Hagar, nganong naguol ka man? Ayaw kahadlok. Nabati sa Dios ang hilak sa bata.
18. Tindog, lakaw, kugosa siya ug pahiloma. Himoon kong dakong nasod ang iyang mga kaliwat.”
19. Unya gipakita sa Dios kang Hagar ang usa ka atabay. Miadto siya sa atabay ug gipuno niyag tubig ang sudlanan, ug gipainom niya ang bata.
20. Nag-uban ang Dios sa bata hangtod nga midako siya. Nagpuyo siya sa kamingawan sa Paran ug nahimo siyang usa ka batid nga mangangayam.
21. Nagpili ang iyang inahan ug usa ka Ehiptohanon nga iyang pangasaw-onon.
22. Niadtong panahona si Abimelec uban ni Picol, ang heneral sa iyang mga kasundalohan, miadto kang Abraham. Ug miingon siya kang Abraham, “Ang Dios nagauban kanimo sa tanan nga imong gibuhat.
23. Busa panumpa dinhi sa atubangan sa Dios nga ako o ang akong mga anak o ang akong mga kaliwat dili nimo limbongan. Nagmatinud-anon ako kanimo, busa ipanumpa nga ikaw magmatinud-anon usab kanako ug niining yuta nga imong gipuy-an.”
24. Miingon si Abraham, “Ipanumpa ko.”
25. Si Abraham misumbong kang Abimelec bahin sa usa ka atabay nga giilog sa mga sulugoon ni Abimelec.
26. Si Abimelec miingon, “Wala ako mahibalo kon kinsay nagbuhat niini. Wala mo ako sultihi bahin niini. Karon pa ako makadungog niini.”
27. Unya gihatagan ni Abraham si Abimelec ug mga karnero ug mga baka ug unya naghimo silag kasabotan.
28. Mikuha si Abraham ug pito ka buok nating karnero nga baye gikan sa iyang panon.
29. Unya nangutana kaniya si Abimelec, “Nganong gihimo mo man kini?”
30. Si Abraham mitubag, “Dawata kining pito ka buok nating karnero nga baye. Sa pagdawat mo niini imong gipasabot nga ako ang nagkalot niining atabaya.”
31. Ug busa gitawag ug Berseba ang maong dapit kay didto man sila magpanumpaay.
32. Tapos mahimo nila ang kasabotan didto sa Berseba, si Abimelec ug si Picol namauli sa yuta sa mga Filistihanon.
33. Unya nagtanom si Abraham ug kahoyng tamarisko didto sa Berseba ug iyang gisimba si Yahweh, ang walay kataposang Dios.
34. Mipuyo si Abraham didto sa yuta sa mga Filistihanon sa dugayng panahon.