27. Kinahanglan moadto kami sa kamingawan nga laktunog tulo ka adlaw aron maghalad kami ngadto sa Ginoo nga among Dios sumala sa iyang gisugo kanamo.”
28. Ang hari miingon, “Paadtoon ko kamo sa kamingawan aron paghalad ngadto sa Ginoo nga inyong Dios kon dili kamo magpalayo pag-ayo. Iampo ako.”
29. Si Moises miingon, “Iniglakaw nako, mag-ampo ako sa Ginoo nga ugma wad-on niya ang mga langaw gikan kanimo, sa imong mga opisyal ug sa imong katawhan. Apan ayaw kami limbongi pag-usab ug ayaw na pugngi ang mga tawo sa paglakaw aron maghalad ngadto sa Ginoo.”
30. Mibiya si Moises sa hari ug nag-ampo siya sa Ginoo.
31. Gihimo sa Ginoo ang gihangyo ni Moises ug nahanaw ang tanang langaw.