1. Unya ang Ginoo miingon kang Moises, “Adtoa ang hari sa Ehipto ug ingna siya, ‘Mao kini ang giingon sa Ginoo: Palakta ang akong katawhan aron mag-alagad sila kanako.
2. Kon dili mo sila palakton, kastigohon ko ang imong nasod pinaagig mga baki.
3. Ang Suba sa Nilo mapuno sa mga baki ug manulod sila sa imong palasyo ug sa imong lawak-higdaanan ug manungtong sa imong katre. Manulod sila sa mga balay sa imong mga opisyal ug katawhan ug bisan pa gani sa imong abohan ug sa imong lutoanan ug pan.
4. Luksoan ka nila ingon man ang imong katawhan ug mga opisyal.’”
5. Ang Ginoo miingon kang Moises, “Sultihi si Aaron, ‘Iisa ang imong sungkod ibabaw sa mga suba, mga kanal ug mga lim-aw ug patunghaa sa yuta sa Ehipto ang mga baki.’”
6. Busa giisa ni Aaron ang iyang kamot ibabaw sa katubigan ug nanungha ang mga baki ug milukop sa yuta.
7. Apan pinaagi sa mga salamangka, nagpatungha usab ang mga salamangkero ug mga baki.
8. Unya gipatawag sa hari si Moises ug si Aaron ug giingnan, “Pag-ampo kamo sa Ginoo nga kuhaon niya ang mga baki ug palakton ko ang inyong katawhan aron maghalad sila ngadto sa Ginoo.”
9. Miingon si Moises sa hari, “Sultihi lamang ako kon kanus-a mo ako paampoa alang kanimo ug sa mga opisyal ug sa imong katawhan aron kining mga baki mobiya kaninyo ug sa inyong mga balay ug adto lamang sila sa Suba sa Nilo.”
10. Ang hari mitubag, “Ugma.”Si Moises miingon, “Mahimo kini sumala sa imong gisulti aron masayran mo nga walay laing dios nga sama sa Ginoo nga among Dios.
11. Ang mga baki mobiya kanimo ug sa imong mga balay ingon man sa imong mga opisyal ug sa imong katawhan ug adto na lamang sila sa suba.”
12. Unya mibiya si Moises ug si Aaron gikan sa hari. Unya nag-ampo si Moises sa Ginoo mahitungod sa mga baki nga iyang gipadala.
13. Gihimo sa Ginoo ang gihangyo ni Moises ug nangamatay ang mga baki nga diha sa mga balay ug sa mga tugkaran niini ingon man kadtong didto sa kaumahan.
14. Dagkong mga pundok sa mga patay nga baki ang nahipos sa mga Ehiptohanon ug nanimaho ang tibuok nasod.
15. Sa pagkakita sa hari nga maarang-arang na ang ilang kahimtang, nagmagahi na usab siya ug wala na mamati kang Moises ug kang Aaron sama sa gipasidaan sa Ginoo.