1. Mao kini ang gisulti ni Moises ngadto sa katawhan sa Israel didto sa kamingawan sa silangang bahin sa Suba sa Jordan. Didto sila niadtong higayona sa Walog sa Jordan duol sa Sup, tungatunga sa lungsod sa Paran sa usa ka bahin ug sa kalungsoran sa Tofel, sa Laban, sa Haserot ug sa Disahab sa laing bahin.
2. Ang gilay-on niini balig 11 ka adlawng panaw gikan sa Bukid sa Sinai agi sa Bukid sa Edomea paingon sa Cades Barnea.
3. Sa unang adlaw sa ika-11 nga bulan sa ika-40 ka tuig tapos sila mobiya sa Ehipto, gisultihan ni Moises ang mga Israelita sa tanang gipasulti sa Ginoo kaniya ngadto sa katawhan.
4. Nahitabo kini human mabuntog sa Ginoo si Sihon nga hari sa mga Amorihanon nga naghari sa Hesbon ug si Og nga hari sa Basan nga naghari sa Astarot ug sa Edrei.
5. Didto sa Moab, tabok sa Jordan, gisaysay ni Moises kining maong balaod.Siya miingon,
6. “Ang Ginoo nga atong Dios miingon kanato didto sa Bukid sa Sinai, ‘Nakapuyo na kamog dugaydugay niining bukira.
7. Padayon kamo ngadto sa kabungtoran sa mga Amorihanon ug sa silingang kayutaan didto sa Walog sa Jordan ug sa kabungtoran ug kapatagan ug sa Negeb ingon man sa kabaybayonan sa Mediteraneo. Padayon kamo sa Canaan ug sa Lebanon hangtod sa dakong Suba sa Eufrates.
8. Tan-awa, giandam ko na ang yuta nga inyong adtoan. Panag-iyaha ninyo kanang yutaa nga akong gisaad sa inyong katigulangan nga si Abraham, si Isaac ug si Jacob ug sa ilang mga kaliwatan.’”
9. Si Moises miingon, “Samtang didto kita sa Bukid sa Sinai giingnan ko kamo nga kon ako lamay mangulo kaninyo, dili ako makaagwanta.
10. Gipadaghan kamo sa Ginoo nga inyong Dios ug karon sama na kamo kadaghan sa kabituonan sa langit.
11. Hinaot pa unta nga ang Ginoo, ang Dios sa inyong katigulangan, mopasanay pa gayod kaninyo sa libo ka pilo sa inyong gidaghanon karon ug magpanalangin kaninyo sumala sa iyang gisaad!
12. Apan dili gayod ako makaantos kon ako lamang ang magdumala kaninyo ug maghusay sa inyong kasungian.
13. Busa gikan sa inyong tagsatagsa ka banay pagpili kamo ug mga tawong maalamon, may katakos ug may kasinatian ug himoon ko sila nga inyong mga pangulo.
14. Ug mitubag kamo nga husto ang akong gisulti kaninyo.
15. Busa gikuha ko gikan sa inyong mga banay ang mga pangulo nga may katakos ug may kasinatian ug gihimo ko sila nga inyong mga pangulo, sa linibo, sa ginatos, sa tagkalim-an ug sa tagnapulo. Nagtudlo usab akog ubang mga opisyal sa inyong banay.
16. Niadtong higayona gimandoan ko ang inyong mga maghuhukom sa paghusay ug sa pagpakanaog ug matarong nga hukom sa inyong mga kasungian ug sa mga langyaw.
17. Kinahanglan nga walay paborpabor ang inyong paghukom. Paminawa ninyo ang mga inila ingon man ang mga dili inila. Ayaw kamo kahadlok sa tawo kay ang hukom nga inyong ipahamtang iya man sa Dios. Ang kaso nga lisod kaayo alang kaninyo, dad-a kanako kay akoy mohusay niini.