18. Ug sa pagsulong sa taga-Siria, nag-ampo si Eliseo sa Ginoo. Miingon siya, “O Ginoo, butai sila.” Busa gibutaan sila sa Ginoo.
19. Unya giingnan sila ni Eliseo, “Dili kini mao ang dalan ug dili kini ang siyudad. Sunod kanako ug dad-on ko kamo sa tawo nga inyong gipangita.” Ug gidala niya sila ngadto sa Samaria.
20. Sa pag-abot nila sa Samaria, si Eliseo miingon, “O Ginoo, pakit-a na sila.” Busa gibalik sa Dios ang ilang panan-aw ug nasayran nila nga didto na diay sila sa taliwala sa Samaria.
21. Sa pagkakita sa hari sa Israel kanila, miingon siya kang Eliseo, “Pamatyon ko ba sila?”
22. Si Eliseo mitubag, “Ayaw sila patya. Pamatyon ba diay nimo pinaagi sa imong espada ug pana ang imong mga binihag? Andami silag pan ug tubig aron mangaon ug manginom sila ug mamauli sa ilang agalon.”
23. Busa nag-andam siyag dakong bangkite alang kanila. Sa dihang nakakaon ug nakainom na sila, gipalakaw niya sila ug namauli sila sa ilang agalon. Ug wala na gayod manulong ang taga-Siria sa Israel.
24. Human niadto, gitigom ni Benhadad nga hari sa Siria ang tanan niyang kasundalohan batok sa Israel ug gilibotan nila ang siyudad sa Samaria.
25. Busa may dakong gutom sa maong siyudad ug bisan gani ang ulo sa asno gibaligya na ug 80 ka plata ug ang ikaupat ka bahin sa usa ka gantang nga iti sa salampati gibaligya nag taglima ka plata.
26. Sa pag-agi sa hari sa Israel duol sa kota sa siyudad, may usa ka babaye nga misinggit kaniya ug miingon, “Tabangi intawon ako, Kamahalan!”
27. Siya mitubag, “Kondili motabang kanimo ang Ginoo, unsa may akong ikatabang? Wala na akoy trigo o bino.”
28. Ug nangutana kaniya ang hari, “Unsa may imong problema?”Ang babaye mitubag, “Kining babayhana miingon kanako nga karong adlawa ang akong anak maoy among kan-on ug ugma ang iya na usab.
29. Busa giluto namo ang akong anak ug gikaon. Ug sa pagkasunod adlaw, giingnan ko siya, ‘Ang anak na usab nimo ang atong kan-on,’ apan gitagoan niya ang iyang anak.”
30. Sa pagkabati sa hari sa gisugilon sa babaye, gigisi niya ang iyang bisti. Niining higayona ang hari naglakaw sa kota sa siyudad ug nakita sa mga tawo nga didto sa ubos nga nagsapaw ang hari ug bisting sako.
31. Siya miingon, “Silotan unta ako sa Dios kon niining adlawa dili ko punggotan sa ulo si Eliseo nga anak ni Safat.”
32. Niadtong higayona si Eliseo naglingkod uban sa mga kadagkoan didto sa iyang balay. Ang hari nagsugo ug usa ka tawo sa pag-adto kang Eliseo apan sa wala pa moabot ang sinugo, si Eliseo miingon sa mga kadagkoan, “Nasayod ba kamo nga kining hari nga mamumuno nagpadalag sinugo aron sa pagpunggot sa akong ulo? Inig-abot sa sinugo, sirhi ang pultahan ug ayaw siya pasudla kay nagsunod kaniya ang hari.”
33. Apan samtang nagsulti pa siya, miabot ang hari ug miingon, “Gikan sa Ginoo kining maong kasamok busa dili na ako mosalig sa Ginoo.”