1. Unya gipatawag ni Hari Josias ang tanang kadagkoan sa Juda ug sa Jerusalem.
2. Ug miadto ang hari sa Templo sa Ginoo kinuyogan sa tanang tawo sa Juda ug sa mga nagpuyo sa Jerusalem ingon man sa mga propeta ug mga pari. Ang tanan gayong mga tawo, inila ug dili inila, mikuyog kaniya ug gibasa niya sa ilang atubangan ang nahisulat sa basahon sa kasabotan nga nakaplagan didto sa Templo.
3. Mitindog ang hari tupad sa haligi ug sa atubangan sa Ginoo misaad siya nga magmatinumanon siya sa Ginoo ug magbuhat sa tanang tulomanon ug kasugoan sa tibuok niyang kasingkasing ug kalag ug sa pagtuman sa tanan nga nahisulat sa basahon sa kasabotan. Ug nanaad usab ang mga tawo.
4. Unya gisugo sa hari ang Pangulong Pari nga si Hilkias lakip ang mga pari nga luyoluyo niya ingon man ang mga magbalantay sa pultahan sa Templo nga ipagula ang tanang galamiton nga gigamit sa pagsimba kang Baal ug sa diosa nga si Asera ug sa tanan nga anaa sa kalangitan. Unya gisunog niya kining tanan didto sa gawas sa kota sa Jerusalem didto sa Walog sa Kidron ug ang mga abo niini gidala ngadto sa Betel.
5. Gipanghinginlan niya ang mga pari nga nag-alagad sa mga diosdios. Kining mga paria gisugo sa mga hari sa Juda sa pagsunog ug insenso didto sa mga halaran sa kabungtoran sa mga siyudad sa Juda ug libot sa Jerusalem. Gilakip usab niya pagpapha gikan sa ilang katungdanan kadtong nagsunog ug insenso alang kang Baal ug alang sa adlaw, sa bulan ug sa mga bituon ug sa tanang butang sa kalangitan.
6. Ug iyang gipagawas sa Templo ang tukon nga giisip nga sagrado nga gihalad sa diosa nga si Asera ug gidala niya kini sa Walog sa Kidron ug gisunog ug unya iyang gisaliyab ang abo niini didto sa lubnganan sa mga yanong tawo.
7. Iya pa gayong giguba ang mga pinuy-anan sa mga lalaki nga nagbaligya sa ilang dungog didto sa Templo sa Ginoo. Dinhi himoa sa mga babaye ang bisti alang sa diosa nga si Asera.
8. Unya ang mga pari iyang gihinginlan gikan sa mga siyudad sa Juda ug iyang giguba ang mga halaran sa mga diosdios nga gisunogan ug insenso sa mga pari, gikan sa Geba hangtod sa Berseba. Gilumpag usab niya ang mga halaran nga nahimutang didto sa mga ganghaan nga binuhat ni Josue, ang gobernador sa siyudad. Ang maong ganghaan makita diha sa wala sa ganghaan sa siyudad paingon sa sulod niini.
9. Ang mga pari nga nag-alagad sa mga halaran didto sa kabungtoran wala tugoti pag-adto sa Templo sa Ginoo apan makakaon silag pan nga walay patubo.
10. Giguba usab ni Josias ang Tofet nga atua mahimutang sa Walog sa Hinom aron wala nay magsunog sa ilang anak niadtong dapita ingon nga halad alang kang Moloc.
11. Ug iya pa gayong gikuha ang mga kabayo nga gihalad sa mga hari sa Juda agig pagsimba sa adlaw ug gisunog ang mga karwahi nga gihalad usab sa adlaw. Kining tanan diha mahimutang sa hawanan sa Templo duol sa ganghaan ug dili layo sa gipuy-an ni Natanmelec, ang pangulong opisyal sa palasyo.
12. Gilumpag niya ang mga halaran didto sa atop sa itaas nga lawak ni Ahaz. Ang mga hari sa Juda maoy nagbuhat sa maong mga halaran. Gilumpag ug gipulpog usab niya ang mga halaran nga gibuhat ni Manases didto sa duha ka hawanan sa Templo sa Ginoo. Ang abo iyang gisaliyab sa Walog sa Kidron.
13. Gipangguba usab niya ang mga halaran sa mga diosdios sa sidlakan sa Jerusalem dapit sa habagatan sa Bukid sa mga Olibo. Si Solomon nga hari sa Israel maoy nagbuhat niining mga halaran alang kang Astarte nga diosa sa Sidon ug alang usab kang Camos nga dios sa Moab ug alang kang Moloc nga dios sa Ammon.
14. Gidugmok usab niya ang mga sagrado kunohayng haligi ug mga tukon ni Asera, unya sa ilang dapit gipuli niya ang bukog sa mga tawo.
15. Gilumpag usab ni Josias ang halaran didto sa Betel nga gibuhat ni Jeroboam nga anak ni Nebat. Si Jeroboam maoy nag-angin sa Israel sa pagpakasala. Gipulpog niya ang mga bato niini ug gisunog ang tukon ni Asera.
16. Sa paglingi ni Josias, nakita niya ang mga lubnganan didto sa bukid ug iyang gipakuha ang mga bukog ug gisunog niya didto sa halaran. Sa ingon, iyang gihugawhugawan ang halaran sumala gayod sa gisulti sa Ginoo pinaagi sa iyang propeta nga maoy mitagna niini.
17. Unya miingon siya, “Unsa ba kanang monumentoha sa unahan?”Giingnan siya sa mga tawo sa siyudad, “Lubnganan kana sa propeta sa Dios nga taga-Juda nga nagtagna niining imong gibuhat karon sa halaran sa Betel.”
18. Ug si Josias miingon, “Ayaw kanag hilabti ug ayaw ipakalot ang iyang mga bukog.”Busa wala nila hilabti ang mga bukog niya ingon man ang mga bukog sa propeta nga taga-Samaria.
19. Giguba usab ni Josias ang tanang mga halaran sa mga diosdios sa mga siyudad sa Samaria nga gibuhat sa mga hari sa Israel nga maoy nakapasuko sa Ginoo. Ang iyang gibuhat didto sa Betel mao usay iyang gibuhat niining mga siyudara.
20. Ug gipamatay niya diha gayod sa halaran ang tanang mga pari nga nag-alagad sa mga halaran sa mga diosdios ug gisunog niya ang mga bukog sa mga tawo diha niini. Unya mipauli siya sa Jerusalem.
21. Unya gisugo sa hari ang tanang mga tawo sa paghimo sa Kasaulogan sa Pagsaylo pahinungod sa Ginoo nga ilang Dios sumala sa nasulat sa basahon sa kasabotan.
22. Kay sukad sa panahon diin mga maghuhukom pa ang nangulo sa Israel o sa panahon sa mga hari sa Israel ug sa Juda, wala gayod himoa kining maong kasaulogan.
23. Apan sa ika-18 nga tuig sa paghari ni Josias, gisaulog kini didto sa Jerusalem.
24. Dugang pa niini, gihinginlan ni Josias ang mga tigkonsultag mga espiritu ug ang mga salamangkero ingon man ang mga diosdios sa tagsatagsa ka banay ug uban pang mga diosdios ug ang tanang hugawng butang sa Juda ug sa Jerusalem aron matuman niya ang mga sugo nga nahisulat sa basahon nga hikaplagan ni Hilkias, ang pari, didto sa Templo sa Ginoo.
25. Wala pa gayoy hari nga ingon kaniya nga misimba sa Ginoo sa bug-os niyang kasingkasing, kalag ug kusog sumala sa tanang balaod ni Moises. Ug wala na gayoy hari nga sama kaniya.
26. Apan bisan pa niining tanan, wala gihapon mapuypoy ang kasuko sa Ginoo batok sa Juda tungod sa pagpalagot ni Manases kaniya.
27. Ug ang Ginoo miingon, “Isalikway ko usab ang Juda ingon sa gibuhat ko sa Israel ug isalikway ko kining siyudara nga akong pinili, ang Jerusalem ug ang Templo nga maoy gipahinungdan ko sa akong pag-ingon, ‘Adto didto pasidunggi ang akong ngalan.’”
28. Ang tanang nabuhat ni Josias nahisulat sa Kasaysayan sa mga Hari sa Juda.
29. Sa naghari pa si Josias, si Neco nga hari sa Ehipto milatas sa Suba sa Eufrates aron pagtabang sa hari sa Asiria. Gitagbo siya ni Hari Josias apan gipatay ni Neco si Josias didto sa Megido.
30. Unya gidala sa mga sundalo ni Josias ang iyang patayng lawas sakay sa karwahi paingon sa Jerusalem ug gilubong sa lubnganan sa mga hari. Si Joacas, ang anak ni Josias, gidihogan sa mga tawo ug gihimong hari puli sa iyang amahan.
31. Si Joacas nagpanuigon ug 23 sa pagsugod niyag hari sa Juda ug naghari siyag tulo ka bulan didto sa Jerusalem. Si Hamutal nga anak ni Jeremias nga taga-Libna maoy iyang inahan.
32. Daotan ang iyang kinabuhi atubangan sa Ginoo sama sa iyang katigulangan.
33. Gipriso siya ni Neco didto sa Ribla, sakop sa Hamat, aron dili siya maghari didto sa Jerusalem. Gipabuhis usab ni Neco ang katawhan ug 3,400 ka kilong plata ug 34 ka kilong bulawan.
34. Si Eliakim, laing anak ni Josias, maoy gihimo ni Neco nga hari puli sa iyang amahan. Giusab ni Neco ang iyang ngalan ug gihimong Joakim. Sa pagbalik ni Neco sa Ehipto, gidala niya si Joacas ug si Joacas didto na mamatay.
35. Busa nagbuhis si Joakim ug plata ug bulawan ngadto sa hari sa Ehipto apan kini binuhis usab sa mga tawo sumala sa ilang bayranan nga gipahamtang sa hari sa Ehipto.
36. Si Joakim nagpanuigon ug 25 sa pagsugod niyag hari ug naghari siyag 11 ka tuig didto sa Jerusalem. Si Sebida nga anak ni Fadaya nga taga-Ruma maoy iyang inahan.
37. Daotan usab ang iyang kinabuhi atubangan sa Ginoo sama sa iyang katigulangan.