1. Sa ikatulong tuig sa paghari ni Hosea nga anak ni Ela sa Israel, ang anak ni Ahaz nga si Ezequias misugod paghari sa Juda.
2. Nagpanuigon siyag 25 sa pagsugod niyag hari ug naghari siyag 29 ka tuig didto sa Jerusalem. Ang iyang inahan mao si Abiha nga anak ni Zacarias.
3. Matarong siyag binuhatan atubangan sa Ginoo sama sa gibuhat ni David nga iyang kagikan.
4. Gipangguba niya ang mga halaran sa mga diosdios, gipamukan niya ang mga haligi ug gipamutol ang mga tukon sa larawan ni Asera. Gidugmok niya ang hinimo ni Moises nga halas nga bronsi nga ginganlag Nehustan kay hangtod niadtong panahona ang katawhan sa Israel nagsunog man ug insenso ingon nga halad niini.
5. Si Ezequias misalig sa Ginoo, ang Dios sa Israel, busa walay hari sa Juda, una man o ulahi kaniya, nga sama kaniya.
6. Nagpabilin siyang matinud-anon sa Ginoo ug gituman niya ang iyang kasugoan.
7. Giubanan siya kanunay sa Ginoo busa nagmauswagon siya. Misukol siya sa hari sa Asiria ug wala moalagad kaniya.
8. Gibuntog niya ang mga Filistihanon hangtod sa Gaza ug sa kasikbit nga kayutaan, gikan sa bantayang-tore hangtod sa kinutaang siyudad.
9. Sa ikaupat nga tuig sa paghari ni Ezequias nga maoy ikapito nga tuig sa paghari ni Hosea sa Israel, misulong sa Samaria si Salmaneser nga hari sa Asiria ug iya kining gilibotan.
10. Nailog niya kini tapos ang tulo ka tuig. Sa ikaunom nga tuig sa paghari ni Ezequias nga maoy ikasiyam nga tuig sa paghari ni Hosea sa Israel, nailog ang Samaria.
11. Gipamihag sa hari sa Asiria ang mga Israelita ngadto sa Asiria ug ang uban didto niya papuy-a sa siyudad sa Hala ug ang uban didto duol sa Suba sa Habor sa kayutaan sa Gosan ug ang uban sa siyudad sa mga Midianhon.
12. Nabuntog ang Samaria kay wala man sila motuman sa sugo sa Ginoo nga ilang Dios ug gilapas nila ang iyang kasabotan ug ang tanang gisugo kanila sa alagad sa Ginoo nga si Moises. Wala sila mamati o motuman.
13. Sa ika-14 nga tuig sa paghari ni Ezequias, si Senakerib nga hari sa Asiria misulong sa tanang kinutaang siyudad sa Juda ug nailog niya kini.
14. Unya si Ezequias nga hari sa Juda nagsulat sa hari sa Asiria nga didto sa Lakis. Matod niya, “Nasayop ako. Hunonga intawon ang inyong pagsulong kay dawaton ko bisan unsay imong ipahamtang kanako.” Busa gipangayoan siya sa hari sa Asiria ug 10,000 ka kilo nga plata ug 1,000 ka kilo nga bulawan.
15. Ug gihatag ni Ezequias ngadto sa hari sa Asiria ang tanang plata sa Templo sa Ginoo ug ang didto sa panudlanan sa palasyo.
16. Gipanguha ni Ezequias ang bulawan nga gihaklap sa sira sa pultahan sa Templo ug ang mga bulawan nga iyang gihaklap sa haligi ug iya kining gihatag sa hari sa Asiria.
17. Gikan sa Lakis gipaadto sa hari sa Asiria ngadto sa Jerusalem ang labawng pangulo sa kasundalohan, ang pangulo sa mga opisyal ug ang laing labawng opisyal uban sa daghang sundalo aron sa pagpakigkita kang Hari Ezequias. Sa pag-abot nila didto, mihunong sila duol sa agianan sa tubig padulong sa kaligoanan sa itaas nga atua mahimutang sa agianan paingon sa dapit sa mga tighimog panapton.
18. Ug sa pagsangpit nila sa hari, ang migula mao ang gipiyalan sa hari sa pagdumala sa palasyo nga mao si Eliakim nga anak ni Hilkias, ang sekretaryo sa palasyo nga si Sebna ug ang tigtipig sa mga dokumento nga si Joas nga anak ni Asaf.
19. Unya ang labawng opisyal nga sinugo sa Hari sa Asiria miingon kanila, “Ingna ninyo si Ezequias nga ang hari sa Asiria nag-ingon, ‘Unsa may imong gisaligan?
20. Nagtuo ka ba nga ang gubat madaog pinaagi sa mga pulong lamang? Unsa may imong gisaligan nga misukol ka man kanako?
21. Nagsalig ka ba sa Ehipto nga daw usa ka buak nga bagakay nga makasamad sa kamot nga mosapigad niini? Sama niana ang hari sa Ehipto sa tanan nga mosalig kaniya.
22. Apan kon moingon ka kanako nga ang Ginoo nga imong Dios maoy imong gisaligan, dili ba mao kana ang dios nga gihalaran didto sa kabungtoran ug imong gipaguba ang maong mga halaran kay nag-ingon ka sa Juda ug sa Jerusalem nga kinahanglan adto sila mosimba atubangan sa halaran sa Jerusalem?
23. Ngari kay makigpusta kanimo ang akong agalon nga hari sa Asiria: hatagan ko ikawg 2,000 ka kabayo kon may mga sundalo ka nga mokabayo niini.
24. Unsaon mo man pagbuntog sa bisag usa lang ka pangulo sa labing ubos nga mga sulugoon sa akong agalon nga nagsalig ka man sa Ehipto aron maoy mohatag kanimog mga karwahi ug mga sundalong nagkabayo?
25. Dugang pa niana, nagtuo ka ba nga wala ako ubani sa Ginoo sa akong pagsulong dinhi aron paggun-ob niining dapita? Giingnan ako sa Ginoo nga sulonga ug gun-oba ang Juda.’”
26. Si Eliakim, si Sebna ug si Joas mihangyo sa labawng opisyal, “Palihog intawon, sulti kanamo sa pinulongan sa taga-Aram kay kami makasabot man sa maong sinultihan. Ayaw pagsulti kanamo sa sinultihan sa taga-Juda aron dili makasabot ang mga tawo nga anaa sa kota kay nagpaminaw sila.”
27. Apan ang labawng opisyal miingon, “Gipaanhi ba ako sa akong agalon aron pagsulti sa imong agalon ug kanimo lamang ug dili sa mga tawong naglingkod sa kota nga sama kanimo mapugos gayod unya sa pagkaon sa ilang tai ug pag-inom sa ilang ihi?”
28. Unya mitindog ang labawng opisyal ug misinggit sa sinultihan sa taga-Juda, “Pamati kamo sa pulong sa gamhanang hari, ang hari sa Asiria!
29. Siya nagpasidaan nga kinahanglang dili kamo magpalimbong kang Ezequias kay dili siya makaluwas kaninyo.
30. Ayaw kamog tuo kaniya kon moingon siya nga kasaligan ang Ginoo. Ang Ginoo dili makaluwas kaninyo ug siya dili makapugong sa dihang ilogon na sa hari sa Asiria kining siyudara.
31. Ayaw kamo pagtuo kang Ezequias kay nag-ingon ang hari sa Asiria nga kon makigdait kamo ug motugyan sa inyong kaugalingon ngadto kaniya, kamong tanan makakaon sa inyong ubas ug mga igos ug makainom gikan sa inyong mga atabay,
32. hangtod nga moanhi siya ug dad-on kamo niya ngadto sa nasod nga sama niining inyong nasod nga daghag trigo ug bino, tinapay ug kaparasan, olibo ug dugos aron dili kamo mangamatay. Ayaw gayod kamo padani kang Ezequias kon moingon siya nga luwason kamo sa Ginoo.
33. May mga dios ba sa mga nasod nga nagluwas kanila gikan sa gahom sa hari sa Asiria?
34. Hain ba ang mga dios sa Hamat ug sa Arfad? Hain ba ang mga dios sa Sefarbaim, sa Hana ug sa Iva? Nakaluwas ba sila sa Samaria gikan sa hari sa Asiria?
35. Kinsa bang dios sa kanasoran ang nakaluwas sa ilang nasod gikan sa hari sa Asiria? Busa makaluwas ba sa Jerusalem ang Ginoo?”
36. Apan naghilom ang mga tawo sa Juda kay gimandoan man sila ni Ezequias sa dili pagtubag.
37. Unya si Eliakim, si Sebna ug si Joas miadto kang Ezequias. Gigisi nila ang ilang mga bisti ug gisuginlan nila ang hari sa tanan nga giingon sa labawng opisyal sa Asiria.