1. Gihimo ni Josias didto sa Jerusalem ang Kasaulogan sa Pagsaylo ug giihaw nila ang nating karnero nga giandam alang sa maong kasaulogan sa ika-14 nga adlaw sa unang bulan.
2. Gihatagan niya ang mga pari sa ilang mga katungdanan ug gidasig niya sila sa pag-alagad sa Templo sa Ginoo.
3. Ug ngadto sa mga Levita nga maoy nagtudlo sa tibuok Israel ug nagtugyan sa ilang kinabuhi ngadto sa Ginoo miingon siya, “Ibutang ang Sudlanan sa Kasabotan diha sa Templo nga gitukod ni Solomon nga anak ni David nga hari sa Israel. Dili kinahanglan nga magsigi kamog pas-an niini. Alagari karon ang Ginoo nga inyong Dios ug ang iyang katawhan, ang mga Israelita.
4. Andama ang inyong kaugalingon sumala sa mga banay diin kamo nahisakop ug sumala sa mga katungdanan nga gihatag kaninyo ni David nga hari sa Israel ug sa iyang anak nga si Solomon.
5. Ug tindog kamo diha sa Balaang Dapit sumala sa banay diin kamo nahisakop ug kinahanglan nga may magrepresentar sa tagsatagsa ka banay nga Levita.
6. Unya ihawa ang nating karnero nga giandam alang sa Kasaulogan sa Pagsaylo ug pagbalaan kamo ug andama ang inyong kaugalingon alang sa pag-alagad sa inyong kaigsoonan ug pagbuhat sumala sa pulong sa Ginoo pinaagi kang Moises.”
7. Unya si Hari Josias mihatag ug halad alang sa mga tawong nanambong: 30,000 ka nating karnero ug kanding ug 3,000 ka torong baka. Gikan kini sa kabtangan sa hari.
8. Ug sa kinabubut-on, ang mga kadagkoan mihatag ug halad alang sa katawhan, sa mga pari ug sa mga Levita. Si Hilkias, si Zacarias ug si Jehiel, ang mga kadagkoan sa Templo sa Dios, mihatag ug 2,600 ka nating karnero ug kanding ug 300 ka torong baka ngadto sa mga pari alang sa mga halad sa kasaulogan.
9. Ang mga pangulo sa mga Levita—si Conanias, si Semaias ug si Netanel nga iyang igsoon, si Hasabias, si Jeiel ug si Josabad—mihatag ug halad ngadto sa mga Levita ug 5,000 ka nating karnero ug nating kanding ug 500 ka torong baka.
10. Sa dihang naandam na ang tanan alang sa kasaulogan, ang mga pari mitindog sa ilang dapit ug ang mga Levita diha sa ilang pundok sumala sa mando sa hari.
11. Ug giihaw nila ang mga nating karnero nga giandam alang sa kasaulogan ug gisablig sa mga pari ang dugo nga ilang nadawat gikan sa mga Levita samtang ang mga Levita nagpanit sa mga inihaw nga mga mananap.
12. Gilain nila ang mga halad nga sunogon aron ikaapod-apod nila kini sumala sa mga pundok sa mga banay diin sila nahisakop aron ihalad ngadto sa Ginoo sumala sa nahisulat sa Balaod ni Moises. Mao usab kini ang ilang gihimo sa mga torong baka.
13. Ug giasal nila ang nating karnero alang sa kasaulogan pinaagi sa kalayo sumala sa tulomanon ug gilat-an nila ang balaang mga halad diha sa mga kulon, sa mga kawa ug diha sa mga kaha ug gidala kini pagdali ngadto sa tanang katawhan.
14. Pagkatapos nagluto usab sila alang sa ilang kaugalingon ug sa mga pari kay ang mga pari nga kaliwat ni Aaron nagkapuliki man pagsunog sa mga halad ug sa mga tambok niini hangtod sa pagkagabii. Busa ang mga Levita maoy nagluto alang sa ilang kaugalingon ug sa mga pari nga kaliwat ni Aaron.
15. Ang mga mag-aawit nga mga kaliwat ni Asaf nga sila si Asaf, Heman ug Jeduton, ang propeta sa hari, diha sa ilang dapit sumala sa sugo ni David. Diha usab sa ilang dapit ang mga magbalantay sa matag ganghaan. Dili kinahanglan nga mobiya sila sa ilang nahimutangan kay ang ilang kaigsoonang mga Levita mao may nagluto alang kanila.
16. Busa ang tanang serbisyo nianang adlawa giandam aron pagtuman sa Kasaulogan sa Pagsaylo ug paghalad sa halad nga sunogon diha sa halaran sa Ginoo sumala sa mando ni Hari Josias.