1. Misakay si Jesus sa usa ka sakayan ug mibalik pagtabok sa lanaw ug miabot sa iyang kaugalingong lungsod.
2. Unya may pipila ka tawo nga naghatod ngadto kaniya ug usa ka paralitiko nga gipahigda sa duyan. Nakita ni Jesus ang kadako sa ilang pagsalig kaniya ug miingon siya sa paralitiko, “Anak, ayaw kabalaka kay gipasaylo na ang imong mga sala.”
3. Unya may pipila ka magtutudlo sa Balaod nga miingon sa ilang kaugalingon, “Nagpasipala sa Dios kining tawhana!”
4. Nasayod si Jesus sa ilang gihunahuna ug miingon siya, “Nganong naghunahuna man kamog daotan?
5. Hain may sayon isulti, ‘Gipasaylo na ang imong mga sala’ o ‘Bangon ug lakaw’?
6. Karon ipakita ko kaninyo nga ang Anak sa Tawo may gahom dinhi sa yuta sa pagpasaylo sa mga sala.” Busa miingon siya sa paralitiko, “Bangon, dad-a ang imong gihigdaan ug pauli sa inyo!”
7. Ug mibangon ang paralitiko ug mipauli.
8. Sa pagkakita sa mga tawo niini, nahingangha sila ug gidayeg nila ang Dios tungod sa paghatag niya niining gahoma ngadto sa mga tawo.
9. Unya mibiya si Jesus niadtong dapita ug samtang naglakaw siya, nakita niya ang usa ka kobrador sa buhis nga ginganlag Mateo nga naglingkod sulod sa iyang opisina. Miingon si Jesus kaniya, “Sunod kanako.”Mitindog si Mateo ug misunod kaniya.
10. Samtang nagkaon si Jesus didto sa balay, may daghang kobrador sa buhis ug mga makasasala nga miduol ug misalo kaniya ug sa iyang mga tinun-an.