1. Milugsong si Jesus gikan sa bungtod ug misunod kaniya ang bagang panon sa katawhan.
2. Unya miduol kaniya ang usa ka sanlahon ug miluhod sa iyang atubangan nga nag-ingon, “Sir, kon gusto nimo makahimo ka paghinlo kanako.”
3. Gihikap siya ni Jesus ug giingnan, “Gusto ko. Mamaayo ka!” Ug dihadiha naayo siya.
4. Unya miingon si Jesus kaniya, “Pamati! Ayaw kinig isaba kang bisan kinsa. Adtoa hinuon dayon ang pari ug ipakita ang imong kaugalingon kaniya unya paghalad sumala sa gisugo ni Moises aron pagmatuod nga naayo ka na.”
5. Sa pagsulod ni Jesus sa Capernaum, gitagbo siya sa usa ka kapitan sa kasundalohang Romanhon nga nagpakiluoy:
6. “Sir, ang akong sulugoon atua sa akong balay naghigda, dili makalihok ug nag-antos pag-ayo.”
7. Si Jesus miingon, “Moadto ako ug ayohon ko siya.”
8. Ang opisyal mitubag, “Ayaw lang pag-adto, Sir, kay dili ako angay nga mopadayon kanimo sa akong balay. Isulti lang ug mamaayo na ang akong sulugoon.
9. Ako mismo ubos sa pagbuot sa labawng mga opisyal ug aduna akoy mga sundalo nga ubos sa akong pagmando. Kon sugoon nako ang usa kanila sa paglakaw, molakaw siya ug kon tawgon nako ang usa, moduol siya ug kon sugoon ko ang akong ulipon sa pagbuhat sa bisan unsa, motuman siya.”
10. Natingala si Jesus sa iyang pagkabati niini ug miingon siya sa mga tawo nga mikuyog kaniya, “Sultihan ko kamo nga bisan dinhi sa Israel wala pa akoy nakitang tawo nga dunay pagtuo nga sama kadako niini.
11. Hinumdomi kini: daghan ang mangabot gikan sa sidlakan ug sa kasadpan ug makigsalo kang Abraham, kang Isaac ug kang Jacob didto sa Gingharian sa langit.
12. Apan sila nga mao untay makaambit diha sa Gingharian itambog hinuon ngadto sa kangitngitan diin maghilak sila ug magkagot ang ilang ngipon.”
13. Ug miingon si Jesus sa opisyal, “Pauli sa inyo ug mahitabo ang imong gituohan.”Ug ang sulugoon sa opisyal naayo niadtong taknaa.
14. Unya miadto si Jesus sa balay ni Pedro ug didto nakita niya ang naghigdang ugangang babaye ni Pedro nga gihilantan.
15. Gihikap niya ang kamot sa masakiton ug gihuwasan kini sa hilanat, mibangon ug misilbi kaniya.
16. Sa pagsalop na sa adlaw, gidala sa mga tawo ngadto kang Jesus ang daghang mga giyawaan. Gipagula ni Jesus ang daotang mga espiritu pinaagi lamang sa pulong ug giayo niya ang tanang masakiton.
17. Gihimo niya kini aron matuman ang giingon ni propeta Isaias, “Siya gayod maoy nag-ayo sa atong mga balatian ug mga sakit.”
18. Sa pagkakita ni Jesus sa daghan kaayong tawo nga nag-alirong kaniya, miingon siya sa iyang mga tinun-an, “Manabok kita sa lanaw.”
19. Unya may usa ka magtutudlo sa Balaod nga miduol kaniya ug miingon, “Magtutudlo, andam ako sa pagkuyog kanimo bisag asa ka moadto.”
20. Si Jesus mitubag kaniya, “Ang mga milo may mga tagoanan ug ang mga langgam may mga salag apan ang Anak sa Tawo walay dapit nga kapahulayan.”
21. Ug may laing tinun-an nga miingon, “Ginoo, mopauli una ako aron paglubong sa akong amahan.”
22. Si Jesus mitubag, “Sunod kanako ug pasagdi ang mga patay nga maoy molubong sa ilang mga minatay.”
23. Misakay si Jesus sa usa ka sakayan ug mikuyog kaniya ang iyang mga tinun-an.
24. Unya mikalit paghuros ang usa ka kusog nga unos ug nasudlag tubig ang sakayan ug hapit kini malunod apan natulog si Jesus.
25. Miduol kaniya ang mga tinun-an ug gipukaw siya, “Ginoo, tabang! Malunod na ta!”
26. Si Jesus mitubag, “Nganong nangahadlok man mo kaayo? Pagkagamay sa inyong pagsalig!” Unya mibangon siya ug gibadlong niya ang hangin ug ang mga balod ug mibanos ang kalinaw.
27. Natingala ang tanan ug miingon sila, “Unsa ba gyod diay kining tawhana nga bisan ang hangin ug ang mga balod mopatuo man kaniya?”
28. Unya miabot si Jesus sa yuta sa Gadara didto sa tabok sa lanaw ug gitagbo siyag duha ka tawo nga nanggula gikan sa mga langub nga gihimong lubnganan. Giyawaan kining mga tawhana ug bangis kaayo busa walay nangahas pag-agi niadtong dalana.
29. Ug misinggit sila, “Anak sa Dios, unsa may imong tuyo kanamo? Mianhi ka ba aron pagsakit kanamo bisag dili pa panahon?”
30. Dili layo didto, may usa ka panon sa mga baboy nga nanibsib.
31. Mihangyo ang mga yawa kang Jesus, “Kon abugon mo kami pasudla kami nianang panon sa mga baboy.”
32. “Sigi, panulod kamo,” miingon si Jesus. Ug mipahawa ang mga yawa ug nanulod sa mga baboy. Unya ang tibuok panon sa baboy nanaglumba paingon sa pangpang ug nangambak sa lanaw ug nangalumos.
33. Ang mga nag-atiman sa mga baboy nanagan ngadto sa lungsod aron pagsugilon sa tanang nahitabo ingon man sa gidangatan sa mga giyawaan.
34. Tungod niini nanggawas ang tanang tawo niadtong lungsora aron pagsugat kang Jesus ug sa ilang pagkakita kaniya, nangaliyupo sila nga mobiya siya sa ilang dapit.