22. Apan gipamub-an sa Dios kadtong mga adlawa, kay kon wala pa, wala untay mabuhi. Apan tungod sa iyang mga pinili, pamub-an niya kadtong panahona.
23. “Unya kon may moingon kaninyo, ‘Tan-awa, dia diri ang Mesiyas!’ o ‘Tua siya didto!’—ayaw kamo pagtuo kaniya.
24. Kay manungha ang mga mini nga Mesiyas ug mga mini nga propeta. Magbuhat silag mga dagkong milagro ug mga katingalahan aron pagpasalaag bisan sa mga pinili sa Dios kon mahimo.
25. Timan-i nga gipasidan-an ko na kamo niini.
26. “Ug kon may moingon kaninyo, ‘Tan-awa, atua siya sa dapit nga awaaw!’—ayaw kamo pag-adto didto. Kon moingon sila, ‘Tan-awa, nagtago siya diri!’—ayaw kamo pagtuo niini.
27. Kay ang Anak sa Tawo moabot sama sa kilat nga mokilab tadlas sa tibuok langit gikan sa sidlakan ngadto sa kasadpan.
28. “Asa gani ang lawas nga patay, adto usab magpundok ang mga agila.
29. “Unya tapos gayod sa kasakitan niadtong mga adlawa, mongitngit ang adlaw ug dili na modan-ag ang bulan. Mangahulog gikan sa langit ang mga bituon ug matay-og ang tibuok kalibotan.
30. Unya motungha sa langit ang timaan sa Anak sa Tawo ug manghilak ang tanang banay sa yuta ug makakita sila sa Anak sa Tawo nga moabot sinapnay sa mga panganod sa langit. Moabot siya nga may gahom ug dakong himaya.
31. Unya motingog ang dakong trumpeta ug ipadala niya ang iyang mga anghel ngadto sa upat ka suok sa kalibotan. Ilang tigumon ang pinili niyang katawhan gikan sa tanang dapit.
32. “Kuhai ninyog pagtulon-an ang kahoyng igera. Inigpanglunhaw ug inigpanghumok na sa mga sanga niini ug magsugod na kinig pangudlot, masayran ninyo nga duol na ang ting-init.
33. Busa inigkakita usab ninyo niining tanan, hisayran ninyo nga duol na ang panahon ug hapit na gayod moabot.
34. Hinumdomi kini: kining tanan mahitabo sa dili pa mangamatay ang tanang tawo nga karon buhi pa.
35. Matapos ang langit ug ang yuta apan ang akong mga pulong magpabilin gayod sa kanunay.
36. “Apan walay tawo nga nasayod kanus-a moabot kadtong adlawa ug taknaa, bisan ang mga anghel sa langit ug bisan gani ang Anak, kondili ang Amahan lamang.
37. Ang pag-abot sa Anak sa Tawo mahisama sa nahitabo sa panahon ni Noe.
38. Sama sa mga adlaw sa wala pa ang lunop, ang mga tawo nagpadayon sa naandan nilang buluhaton sama sa pagkaon ug pag-inom ug pagminyoay, hangtod gayod sa adlaw nga misulod si Noe sa arka.
39. Apan wala sila masayod sa nahitabo hangtod nga ang lunop miabot ug mibanlas kanilang tanan. Sama unya niini ang mahitabo inig-abot sa Anak sa Tawo.
40. Niadtong panahona, duha ka tawo magtrabaho sa uma: ang usa kuhaon ug ang usa ibilin.
41. Duha ka babaye maggaling ug pagkaon: ang usa kuhaon ug ang usa ibilin.
42. Busa pagbantay kamo kay wala kamo masayod kon unsang adlawa moanhi ang inyong Ginoo.