18. Si Jesus mitubag kanila, “Nakita ko si Satanas nga nahulog ingon sa kilat gikan sa langit.
19. Pamati kamo! Gihatagan ko kamog gahom aron makahimo kamo pagyatak sa mga bitin ug sa mga tanga ug sa tanang gahom sa Yawa, ug walay makaunsa kaninyo.
20. Apan ayaw kamog kalipay tungod kay ang mga yawa mipatuo kaninyo kondili paglipay hinuon kamo kay ang inyong mga ngalan nahisulat didto sa langit.”
21. Niadtong higayona gilipay si Jesus sa Espiritu Santo ug miingon siya, “Amahan, Ginoo sa langit ug sa yuta, nagpasalamat ako kanimo tungod kay gipadayag mo man ngadto sa mga walay kahibalo ang imong gililong sa mga makinaadmanon ug sa mga may kahibalo. Oo, Amahan, natuman kini kay mao may imong kabubut-on.
22. “Gitugyan kanako sa akong Amahan ang tanang butang. Walay nakaila sa Anak gawas sa Amahan ug walay nakaila sa Amahan gawas sa Anak ug kanila nga gipili sa Anak aron pailhon kinsa ang Amahan.”
23. Unya miatubang si Jesus sa mga tinun-an ug miingon kanila lamang, “Bulahan ang nakakita sa mga butang nga inyong nakita!
24. Kay sultihan ko kamo nga daghang mga propeta ug mga hari ang buot motan-aw sa inyong nakita apan wala makakita ug buot mamati sa inyong nadungog apan wala makabati.”
25. Unya miduol ang usa ka magtutudlo sa Balaod aron pagsulay kang Jesus. Nangutana siya, “Magtutudlo, unsay kinahanglan kong buhaton aron ako makadawat sa kinabuhing dayon?”
26. Si Jesus mitubag kaniya, “Unsa may giingon sa Kasulatan? Ug giunsa man nimo kini pagsabot?”
27. Ang magtutudlo sa Balaod mitubag, “ ‘Higugmaa ang Ginoo nga imong Dios sa tibuok mong kasingkasing ug sa tibuok mong kalag ug sa tibuok mong kusog ug sa tibuok mong hunahuna’ ug ‘Higugmaa ang imong isigkatawo ingon sa paghigugma mo sa imong kaugalingon.’”