18. Hunahunaa ninyo ang gibuhat sa mga Israelita: kadtong nagkaon sa halad-sinunog nakaambit sa pag-alagad sa Dios diha sa halaran.
19. Wala ako mag-ingon nga may bili ang diosdios o ang pagkaon nga gihalad ngadto sa diosdios.
20. Ang gipasabot ko mao nga kadtong gihalad diha sa mga halaran sa dili magtutuo gihalad ngadto sa mga yawa, dili ngadto sa Dios. Dili ko buot nga mahimo kamong kaabin sa mga yawa.
21. Dili mahimong moinom kamo gikan sa kupa sa Ginoo ug sa kupa usab sa mga yawa. Dili mahimong mokaon kamo diha sa kan-anan sa Ginoo ug sa kan-anan sa mga yawa.
22. Hagiton ba nato ang Ginoo aron mangabubho kanato? Nagtuo ba kamo nga kita gamhanan pa kay kaniya?