1. ’n Stuk droë brood en rustigheid daarby is beter as ’n huis vol feesmaaltye met getwis.
2. ’n Wyse dienskneg sal heers oor ’n seun wat skande maak en sal die erfenis deel saam met die broers.
3. Die smeltkroes is vir silwer en die oond vir goud, maar יהוה toets die binneste.
4. Die bose luister vir valse lippe, maar die regverdige luister nie na die tong van gewelddadige manne nie.
5. Hy wat met die arme spot, tart sy Maker; hy wat bly is oor ’n katastrofe, sal nie vergewe word nie.
6. Kinders se kinders is die kroon vir ou manne en die lof en eer van die kinders is hulle vader.
7. Uitstekende taal pas nie by ’n dwaas nie en ook nie leuentaal by ’n regverdige nie!
8. ’n Kosbare edelgesteente is mooi in die oë van sy besitter; oral waar dit gaan word dit bewonder.
9. Hy wat ’n oortreding vergeet, soek vriendskap, maar hy wat dit haat om ’n oortreding te vergeet, vervreem homself van ’n vriend en naaste.
10. ’n Berisping breek die binneste van die wyse; die dwaas ontvang straf, maar besef dit nie.
11. Die twisgierige soek moeilikheid; daarom sal ’n wrede boodskapper teen hom gestuur word.
12. Bepeinsing en respekvolle vrees pas by ’n wyse man, maar ’n dwaas bepeins sy sinnelose boosheid.
13. Hy wat goed met boosheid vergeld, die boosheid sal nie uit sy huis wyk nie.
14. Hy wat bloed vergiet, maak oordeel wakker voor die heerser.
15. Beide hy wat die bose regverdig verklaar en hy wat die regverdige veroordeel, is verwerplik voor יהוה.
16. Wat is die waarde van rykdom in die besit van die dwaas wat geen begeerte het om wysheid te bekom nie?
17. ’n Vriend het te alle tye lief, maar ’n broer word gebore vir teëstand.
18. ’n Dwase mens bied homself aan as borg, want hy word versekering vir sy naaste.
19. Hy wat oortreding liefhet, het bedrog en twis lief en hy wat homself verhoog, soek vernietiging.
20. Hy wat in sy verstand, wil en emosie sleg praat, sal nie die goeie vind nie; hy wat ’n bose tong het, verval in boosheid.
21. Hy wat ’n dwaas verwek, doen dit tot sy eie skande; sy vader sal geen vreugde in hom hê nie.
22. ’n Vrolike binneste maak die liggaam gesond, maar ’n gebroke gees droog die gebeente uit.
23. Hy wat omkoopgeld aanvaar is boos, want hy verdraai hoe die regverdige oordeel werk.
24. Die gesig van die man van insig, is na wysheid, maar die oë van die dwaas na die dieptes van die aarde gedraai.
25. ’n Dwase seun tart sy vader en is bitterheid vir haar wat geboorte aan hom gegee het.
26. Om die regverdige te straf of om die regverdige man, wat die waarheid praat, te slaan, is nie goed nie.
27. Hy wat sy woorde spaar, besit kennis en hy wat geduldig is, is ’n wyse man.
28. Selfs ’n dwaas, wanneer hy stilbly, word as wys beskou en hy wat sy lippe toehou, as ’n man van insig.