2. “Ek gee om vir hierdie mense, want hulle bly al drie dae by My en het niks om te eet nie
3. en as Ek hulle, sonder om te eet, huis toe stuur, sal hulle op die pad flou word, want sommige van hulle kom van ver af.”
4. Sy studentevolgelinge antwoord Hom: “Waarvandaan is dit moontlik vir ’n mens om hulle in hierdie verlate plek te kan versadig met brood?”
5. Hy vra vir hulle: “Hoeveel brode het julle?” Hulle sê: “Sewe.”
6. Hy gee aan die skare mense bevel om op die grond te gaan sit, neem die sewe brode en nadat Hy dit geseën het, breek Hy dit en gee dit aan Sy studentevolgelinge om dit te bedien en hulle het die menigte mense bedien.
7. Hulle het ook ’n paar klein vissies gehad en nadat Hy hulle ook geseën het, sê Hy dat hulle dit ook moet bedien.2 Kon 4:43,44; Mat 14:14-21; Mat 15:32-39
8. Hulle het geëet tot versadiging en die stukkies wat oorgebly het opgetel; sewe mandjies vol.
9. Die mans wat geëet het, was vier duisend
10. en Hy het hulle weggestuur. Dadelik het Hy saam met Sy studentevolgelinge in die boot geklim en na die Dalmanuta streek gegaan.
11. Die Fariseërs het uitgegaan en Hom uitgevra en van Hom ’n teken uit die hemel gevra om Hom te toets.
12. Hy sug swaar in Sy Gees en sê: “Waarom begeer hierdie geslag ’n teken? Dit is waar, Ek sê vir julle, aan hierdie geslag sal sekerlik geen teken gegee word nie.”
13. Hy het van hulle af weggegaan, in die boot geklim en na die oorkant toe gegaan
14. en hulle het vergeet om brood saam te vat en het nie meer as een koek by hulle in die boot gehad nie.
15. Hy het hulle beveel en vir hulle gesê: “Let op en wees versigtig vir die suurdeeg van die Fariseërs en die suurdeeg van Herodes.”
16. Toe bespreek hulle onder mekaar en sê: “Dit is omdat ons nie brood het nie.”
17. Yeshua het geweet en Hy sê vir hulle: “Waarom bespreek julle dit dat julle nie brood het nie? Begryp of verstaan julle nog steeds nie? Is julle verstand nog hard?
18. Het julle oë en sien julle nie? Het julle ore en hoor julle nie? Onthou julle nie?
19. Toe Ek die vyf brode vir die vyf duisend gegee het; hoeveel mandjies vol stukke het julle opgetel nadat hulle versadig was?” Hulle sê vir Hom: “Twaalf.”
20. “En die sewe vir die vier duisend; hoeveel mandjies vol stukke het julle opgetel nadat hulle versadig is?” Hulle sê: “Sewe.”
21. Hy sê vir hulle: “Hoe is dit dat julle tot nou toe nie verstaan nie?”
22. Hy het in Beit-Tzaidah gekom en hulle het ’n blinde man na Hom toe gebring en Hom gesmeek om hom aan te raak.