1. Ek beveel jou, voor God en ons Meester Yeshua, Die Gesalfde Een; Hy wat die lewende en dié wat dood is, gaan oordeel by die openbaring van Sy Koninkryk:
2. verkondig die boodskap; staan ywerig daarop, tydig en ontydig; berispe, spreek aan met baie aanhoudende geduld en lering,
3. want daar kom ’n tyd dat hulle die ware leer nie sal gehoorsaam nie, maar leermeesters bymekaarmaak volgens hulle eie begeertes, wat hulle gehoor kan streel
4. en hulle sal hulle ore van die waarheid af wegdraai en na fabels toe draai.
5. Jy egter, wees waaksaam in alles. Verdra booshede; doen die werk van ’n verkondiger van die goeie boodskap en vervul jou bediening,
6. want ek word daarom as ’n offer geoffer en die tyd van bevryding het aangebreek.
7. Ek het die goeie geveg baklei, my resies voltooi en my vertroue behou.
8. Van nou af is daar vir my opsy gesit die kroon van onpartydige opregtheid waarmee my Meester my sal beloon op die dag wat Hy die regverdige sal beoordeel en nie aan my alleen nie, maar ook aan almal wat Sy openbaring liefgehad het.
9. Doen moeite om gou na my toe te kom,
10. want Demas het my verlaat, uit liefde vir die huidige wêreld en het weggegaan na Thessalonike; Kreskes na Galatia en Titos na Dalmatia.
11. Slegs Luka is by my. Vat vir Markos en bring hom saam met jou, want hy is vir my geskik vir die bediening.
12. Tugikos het ek na Efesos gestuur.
13. As jy kom, moet jy die boektas bring wat ek by Karpos in Troas gelos het en die boekrolle, veral dié rolle van perkament.
14. Alexander, die kopersmid, het my groot boosheid aangedoen. Mag ons Meester hom beloon volgens sy dade!
15. Wees jy ook versigtig vir hom, want hy is baie arrogant teenoor ons boodskappe.
16. By my eerste verdediging het niemand my ondersteun nie, maar almal het my verlaat. Mag dit nie teen hulle bereken word nie!
17. My Meester het my egter ondersteun en my in staat gestel sodat deur my die verkondiging heeltemal voltooi kan word en al die ander nasies dit kan hoor, dat ek uit die bek van die leeu bevry is
18. en my Meester sal my bevry van elke bose daad en sal aan my Lewe gee in Sy Koninkryk, wat in die hemel is, want tot Hom is die eer, lof en aanbidding vir tydlose ewigheid! Dit is waar.
19. Groet Priskilla en Akulas en die huis van Onesiforos.
20. Erastos het in Korinthos gebly. Troļ¬mos het ek siek in Miletos gelos.
21. Doen moeite om voor die winter te kom. Eubulos, Pudes, Linos, Klaudia en al die broers groet jou.
22. Ons Meester, Yeshua, Die Gesalfde Een, is met jou gees! Onverdiende guns bly by jou! Dit is waar.