1. “Toe het ons in die rigting van Basan getrek. Koning Og van Basan en sy weermag het teen ons uitgetrek en ons by Edreï ingewag.
2. Die Here het egter gesê: ‘Moenie vir Og bang wees nie. Julle sal hom en sy volk verslaan en sy land vir julle vat. Maak met hom soos julle met Sihon, die Amoritiese koning van Gesbon, gemaak het.’
3. Die Here het ons gehelp om Og en sy mense te oorwin. Ons het die volk uitgewis. Niemand het oorgebly nie.
4. Ons het ook al die stede ingeneem. Daar was nie ’n plek wat ons nie oorwin het nie. Altesaam 60 stede en die hele Argobgebied waar Og regeer het, was binne ’n kort tyd ons s’n.
5. Al hierdie stede het hoë mure en versterkte ingange gehad. Dan was daar ook nog baie kleiner plekkies sonder mure om wat ons ingeneem het.